मुसिकोटकाे छेरामा मोटरसाइकल र मिनि ट्रक ठोक्किँदा दुईजना घाइते 

रुकुम पश्चिमको मुसिकोट नगरपालिका ३ छेरामा मिनिट्रक र मोटरसाइकल ठोकिँदा दुई जना घाइते भएका छन्। 

शुक्रबार बिहान मुसिकोट नगरपालिका ४ को सोलाबाङबाट माछिमीतर्फ जाँदै गरेको रा ५ प ७० नम्बरको मोटरसाइकल सानीभेरीको सिम्लीबाट दाङतर्फ जाँदै गरेको रा १ ख १४९३ नम्बरको मिनि ट्रकमा ठोकिएको 
बताइएको छ । 

दुर्घटनाको खबर लगत्तै घटनास्थल पुग्नुभएका त्री सिद्धेश्वरी राप्ती यातायात समितिका रुकुम इन्चार्ज टेकबहादुर बिकले दुर्घटनामा परेर मोटरसाइकलमा सवार दुईजना घाइते हुनुभएको जानकारी दिनुभयो। घाइते हुनेहरुमा रुकुम पश्चिमको त्रिवेणी गाउँपालिका ७ निवासी टिकाराम केसी र भीम प्रकाश डांगी रहेको इन्चार्ज बिकले बताउनुभयो । 

घाइतेहरूलाई प्रहरी चौकी सोलाबाङका इन्चार्ज गणेश बिक, स्थानीय लगायतका टोलीले उद्धार गरेर जिल्ला अस्पताल सल्ले पुर्‍याएको थियो।

दुवैजना घाइतेलाई जिल्ला अस्पतालमा प्राथमिक उपचारपछि थप उपचारको लागि नेपालगञ्ज रिफर गरिएको छ। 

ट्रक चालक सल्यानका निर्मल बिक फरार रहेको र उहाँको खोजी भइरहेको प्रहरीले जनाएको छ।