पाँच लाख ११ हजार पुरस्कार राशिको तेस्रो रुकुम कप भलिबलको उपाधि बौदीकालीको हातमा

रुकुम पश्चिम । जेठ १९ गतेदेखि रुकुम पश्चिममा जारी तेस्रो रुकुम कप भलिबल सोमबार सम्पन्न भएको छ । 

रुकुम पश्चिम भलिबल केन्द्रको आयोजनाम र साझा मुराल अस्पताल प्रा.लि.को मुख्य प्रायोजनमा भएको तेस्रो रुकुम कप भलिबलको उपाधि नवलपुरको टिम बौदीकालीले हात पारेको छ । 

मुसिकोट नगरपालिका वडा नम्बर १ खलंगास्थित बराहाटाकुरामा सोमबार भएको फाइनलमा हाम्रो सरोकार रुकुम पश्चिमलाई पराजित गर्दै बौदीकालीले उपाधि हात पार्न सफल भएको हो । बौदीकालीले फाइनलमा हाम्रो सरोकारलाई ३–० को सोझो सेटमा पराजित गरेको हो । 

दुवै टिममा राष्ट्रिय स्तरमा ख्याति प्राप्त खेलाडीहरू रहेका थिए । विजेता बौदीकालीमा हिमाल सुनारी, सरोज वर्देवा, राजन दर्लामी मगर लगाएका खेलाडी रहेका थिए भने हाम्रो सरोकारमा नेपाल आर्मीका धनबहादुर भट्ट, कोसी प्रदेशका क्याप्टेन विष्णु बस्नेत तथा मनोज घिमिरे लगायतका खेलाडीहरू रहेका थिए । विजेता बौदीकालीले नगद ५ लाख ११ हजार, कप, मेडल र प्रमाण पत्र प्राप्त गरेको आयोजक रुकुम पश्चिम भलिबल प्रशिक्षण केन्द्रले जनाएको छ । 

उप विजेता हाम्रो सरोकारले नगद २ लाख ६१ हजार, कप, मेडल र प्रमाणपत्रमा आत पार्न सफल भएको छ । प्रतियोगितामा टिम खनाल रुकुम पश्चिम तेस्रो र वनगाड कुपिण्डे सल्यान सान्त्वना भएको छ । टिम खनालले १ लाख ५१ हजार र टिम वनगाडले १ लाख ११ हजार पुरस्कार प्राप्त गरेका छन् । प्रतियोगितामा ७ टिमले प्रतिस्पर्धा गरेको आयोजक भलिबल केन्द्रका अध्यक्ष तेज बुढाले जानकारी दिनुभयो । 

रुकुम कपको महिला तर्फ भने बाँफिकोट गाउँपालिका रुकुम पश्चिमले उपाधि हात पारेको छ । आइतबार भएको फाइनलमा जनज्योति युवा विकास केन्द्र रुकुम पूर्वलाई ३–० को सोझो सेटमा पराजित गर्दै बाँफिकोटले उपाधिमा कब्जा जमाएको हो । उसले १ लाख नगद सहित ट्रफि, मेडल र प्रमाण पत्र प्राप्त गरेको छ । 

उपविजेता जनज्योतिले नगद ७५ हजार, ट्रफि मेडल र प्रमाणपत्र तथा तेस्रो बनेको रुकुम भलिबल टिमले नगद ५० हजार नगद, ट्रफि, मेडल र प्रमाणपत्र हात पारेको छ । चौथो भएको सीमा भलिबल क्लब रुकुम पूर्वले २५ हजार नगद पुरस्कार पाएको भलिबल प्रशिक्षण केन्द्रका अध्यक्ष बुढाले जानकारी दिनुभयो । 

यो प्रतियोगिता पुरस्कार राशिका हिसाबले कर्णाली प्रदेशकै सर्वाधिक पुरस्कार राशिको प्रतियोगिता रहेको आयोजकको भनाई छ ।