दुलीमा भएको ट्याक्टर दुर्घटनाका घाइतेको मृत्यु, चालक पक्राउ

रुकुम पश्चिममा शनिबार बिहान भएको ट्याक्टर दुर्घटनाका एक जना घाइतेको मृत्यु भएको छ । 

जिल्लाको बाँफिकोट गाउँपालिका -१० का १७ वर्षीय पुर्ण बहादुर खड्काको जिल्ला अस्पताल सल्लेमा उपचारको क्रममा मृत्यु भएको हो । 

जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक हरिप्रसाद पुनका अनुसार आज बिहान बाँफीकोट गाउँपालिका -८ दुलीमा भएको ट्याक्टर दुर्घटनामा परेर खड्का गम्भीर घाइते हुनुभएको थियो । 

छिनखेत देखी मग्मा जोड्ने भित्री सडक खण्डमा दुली देखी छिनखेततर्फ जाँदै गरेको ना ६ त ७११३ नम्बरको ट्याक्टर दुर्घटना भएको थियो । 

बाँफिकोट गाउँपालिका -१० बस्ने २२ वर्षीय अभिषेक चन्दले चलाएको उक्त ट्याक्टर अनियन्त्रीत भई सडक देखी करिव ५०० मिटर तल खसेको प्रहरीले जानकारी दिएको छ । 

दुर्घटना हुँदा ट्याक्टरमा सवार खड्काको निधारमा गहिरो चाेट लागेको थियो । घाइते खड्काको उपचारको क्रममा मृत्यु भएको हो । 

प्रहरीले चालक चन्दलाई नियन्त्रणमा लिएकाे जनाएको छ ।