सानीभेरीमा घाँस काट्न गएका खड्काको भीरबाट लडेर मृत्यु

रूकुम पश्चिमको सानीभेरी गाउँपालिकामा एक जनाको भीरबाट खसेर मृत्यु भएको छ। 

सानीभेरी गाउँपालिका वडा नम्बर १० भेरीडाँडा निवासी ५८ वर्षीय रत्नबहादुर खड्काको भीरबाट खसेर मृत्यु भएको हो। 

जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक हरिप्रसाद पुनका अनुसार बिहीबार जिउलामा रहेको आफ्नो गोठदेखि लिउरीबारी खोलामा घाँस काट्न गएको बेला भीरबाट खसेर खड्काको मृत्यु भएको हो ।

खड्का आज बिहान गोठदेखि एक किलोमिटर टाढाको दूरीमा रहेको लिउरीबारी खोलामा घाँस काट्न भनेर जानुभएको थियो। 

प्रहरीका अनुसार लामो समयसम्म सम्पर्कमा नआउँदा आफन्तहरूले खोज्ने क्रममा आज दिउँसो खड्का मृत अवस्थामा फेला पर्नुभएको छ। 

उहाँको शव पोस्टमार्टमको लागि जिल्ला अस्पताल सल्ले ल्याइँदै गरेको बताइएको छ ।