पिपलको शिविरबाट एक हजार दुई सय बढीको नि:शुल्क उपचार 

रुकुम पश्चिमको बाँफिकोट गाउँपालिका २ पिपलको जिपुमा सञ्चालित स्वास्थ्य शिविरबाट एक हजार दुई सय बढीले निःशुल्क स्वास्थ्य सेवा पाएका छन् । 

शनिबार र आईतबार सञ्चालन भएको शिविरबाट एक हजार २९५ जनाले सेवा लिएको वडा अध्यक्ष प्रकाश खत्रीले जानकारी दिनुभयो । उहाँका अनुसार शिविरबाट ८७६ जना महिला र ४१९ जना पुरुषले निःशुल्क स्वास्थ्य सेवा लिएका हुन् । 

बाँफिकोट गाउँपालिका २ नम्वर वडा कार्यालयले त्रिवि शिक्षण अस्पताल महाराजगञ्जको सहकार्यमा पिपलमा स्वास्थ्य शिविर आयोजना गरेको हो । वडा अध्यक्ष खत्रीका अनुसार रुकुम पश्चिम र रुकुम पूर्व समेतका सर्वसाधारणहरुको शिविरबाट सेवा लिएका छन् । 

शिविरबाट सामान्य चिकित्सा, स्त्री तथा प्रसुती रोग, हाडजोर्नी, नाक, कान, घाँटीको जाँच तथा उपचार, मुटु, मृगौला, फोक्सो जाँच तथा उपचार, छाला रोग उपचार, स्नायु तथा मानसिक रोग जाँच तथा उपचार सेवा प्रदान गरिएको छ ।

त्यसैगरी मुत्ररोग उपचार, आँखाको जाँच तथा उपचार, दाँत परिक्षण तथा उपचार, पेट, आँन्द्रा, कलेजो, पित्तथैलीको जाँच तथा उपचार र सुगर, प्रेसर जाँच लगायतका सेवा प्रवाह भएको वडा कार्यालयले जनाएको छ । 

शिविरमा शिक्षण अस्पताल महाराजगञ्जका वरिष्ठ चिकित्सकहरु, मेडिकल अधिकृत लगायतको टोलीले सेवा दिएको हो ।