रुकुम पुर्वमा 'हिमालय टुरिष्ट हब' शुभारम्भ

रुकुम पूर्वको पर्यटन प्रवर्द्धन गर्ने उद्देश्यले ‘हिमालय टुरिष्ट हब कार्यक्रम’ को आज औपचारिक शुभारम्भ गरिएको छ।

लुम्बिनी प्रदेश सरकार अन्तर्गत उद्योग, पर्यटन तथा यातायात मन्त्रालयको आयोजना तथा सिस्ने गाउँपालिकाको सहजीकरणमा  ‘कमलदह हिमालय पर्यटन स्टेशन प्रवर्द्धन कार्यक्रम’ को शुभारम्भ गरिएको हो ।

रुकुम पूर्वमा पर्यटकीय पूर्वाधार निर्माण गर्दै समग्र प्राकृतिक तथा सांस्कृतिक क्षेत्रलाई समेटेर स्थानीय तह र निजी क्षेत्रको समन्वय र सहकार्यमा हिमालय पर्यटन हब शुभारम्भ घोषणा गरिएको हो ।

यस अवसरमा विभिन्न प्रतिबद्धताहरु घोषणा गरिएको छ ।

रुकुम पूर्वको रुकुमकोट, कमल दह क्षेत्रलाई हिमालय पर्यटन हबको रुपमा स्थापित गर्न होटेल ब्यबसायीहरुले पर्यटनस्तरका होटेलहरु संचालन गर्न प्याकेज  घोषणा गर्ने, पर्यटन विकास परिषदको सहकार्यमा सिस्ने गाउँपालिकाले पर्यटन सूचना केन्द्र स्थापना गरी संचालन गर्ने, उ‌द्योग वाणिज्य संघले कोशेली घर संचालन गर्ने, रुकुमकोट आसपासका पर्यटकीय गन्तब्य स्थलहरुमा साइकिलिङ, जिपलाईन, साईनसङ लगाएतका गतिबिधिहरु संचालन गर्ने प्रतिवद्धता गरिएको छ । 

त्यसैगरी रुकुमकोटको कमलदह क्षेत्रलाई आधारमानी सिस्ने गाउँपालिकाको गुप्तदह, भूमे गाउँपालिकाको चौरिलेक र पुथा गाउँपालिकाको सुनदहसम्म निजी क्षेत्र, होटेल ब्यबसायी तथा अन्य सरोकारवालाहरुको सहकार्यमा पर्यटकीय पदमार्ग संचालन गर्ने, पर्यटन विकास परिषद र तीनवटै स्थानीय तहसंगको सहकार्यमा पर्यटन डिभिजन कार्यालय बाँकेले पर्यटकीय गन्तव्यहरुको भिडियो र प्रचारप्रसार सामग्री तयार गर्ने, पर्यटन विकास परिषद र तीनवटै स्थानीय तहसंगको सहकार्यमा टुर गाइड र हस्पिटालिट तालिम उपलब्ध गराउने, र्याफ्टिङ ब्याबसायीहरुले व्यावसायिक रुपमा वडा न ६ को घारिधाउने देखि सिस्ने वडा नम्वर ७ को सिस्नेरी बगरसम्म र्याफ्टिङ संचालन गर्ने र प्रदेश र स्थानीय तहले संघीय सरकार समेतको सहकार्यमा क्रमश पर्यटकीय पूर्वाधार निर्माण र प्रबर्धनात्मक कार्यहरु गर्ने  प्रतिबद्धता यस अवसरमा गरिएको छ । 

कार्यक्रममार्फत रुकुम पूर्वका प्राकृतिक, सांस्कृतिक र ऐतिहासिक महत्व बोकेका पर्यटकीय क्षेत्रहरूलाई पर्यटकीय गन्तव्यको रूपमा विकास गर्ने लक्ष्य लिइएको जनाइएको छ। कार्यक्रमले स्थानीय पर्यटन व्यवसायमा सकारात्मक प्रभाव पार्ने अपेक्षा गरिएको छ।

प्रदेश सचिव नारद गौतमको अध्यक्षतामा भएको शुभारम्भ कार्यक्रममा जिल्ला समन्वय समितिका उपप्रमुख मोहन बहादुर के सीको प्रमुख आतिथ्यता रहेको थियो । उक्त उद्घाटन कार्यक्रममा जिल्ला भित्रका सम्पूर्ण जनप्रतिनिधि, सरकारी तथा गैरसरकारी कार्यालयका प्रमुख तथा प्रतिनिधिहरू, राजनीतिक दल, सुरक्षा निकाय, स्थानीय पर्यटन व्यवसायी, सञ्चारकर्मी लगायतको उल्लेख्य उपस्थिति रहेको थियो।

कार्यक्रमको शुभारम्भमा स्थानीय झाकि, पन्चेबाजा, सिङगारु नाच, पैसेरि नाच, मयुर नाच प्रस्तुत गरिएको थियो । शुरुवातमा कमलदह परिसरमा रहेको हिमालय पर्यटन हबको बोर्ड प्रदेश सचिब र प्रमुख अतिथिबाट रिबन काटि उद्घ्घाटन भएको थियो भने लगतै सिस्ने गाउंपालिका रुकुम पूर्वको सभाहलमा औपचारिक कार्यक्रम गरिएको थियो ।

कार्यक्रममा सिस्ने गाउँपालिका रुकुम पूर्वका अध्यक्ष  कृष्ण रेग्मीले स्वागत मन्तब्य राख्नु भएको थियो भने प्रदेश सचिब नारद गौतमले लुम्बिनि प्रदेश उद्योग पर्यटन तथा यातायात मन्त्रालको तर्फबाट घोषणा पत्र सार्वजनिक गर्नु भएको थियो ।

कार्यक्रममा बिभिन्न क्षेत्रका वक्ताहरुले पर्यटन विकासका सम्भाबना अवसर तथा चुनौतिहरुबारे आफ्ना धारणा राख्नु भएको थियो ।