रुकुम कारागारलाई न्यू मुनलाईट स्कुलले दियो सोलार सेट

रुकुम पश्चिमस्थित कारागार कार्यालयलाई सौर्य उर्जा सेट प्रदान गरिएको छ । 

मुसिकोट नगरपालिका –५ स्थित न्यू मुनलाईट सेकेन्डरी बोर्डिङ स्कुलले कार्यालयलाई सोलार सेट उपलब्ध गराएको हो । 

कारागार प्रशासक तारा बहादुर कुँवरका अनुसार १५० वाटको सौर्य उर्जा सेट प्राप्त भएको हो । उहाँका अनुसार सौर्य उर्जाले कारागारको बन्दी आवास गृहको विद्युत आपूर्ति व्यवस्थापनमा सहयोग पुग्ने छ । 

न्यू मुनलाईट सेकेन्डरी बोर्डिङ स्कुलका प्रिन्सीपल खड्क कुवँरले विद्यालयको सामाजिक उत्तरदायित्व कार्य अन्तर्गत कारागारमा सोलार सेट प्रदान गरिएको बताउनुभयो । उहाँले कारागारका कैदीबन्दीहरुको आवास गृहमा विद्युत आपूर्तिमा समस्या आईरहेको जानकारी पश्चात उक्त समस्या समाधान गर्न सौर्य उर्जा सेटको व्यवस्थापन गरिएको जानकारी दिनुभयो । 

प्रमुख जिल्ला अधिकारी कुलबहादुर जिसीले विद्यालयले गरेको महत्वपूर्ण सहयोगको प्रशंसा गर्नुभयो । उहाँले विद्युतको अनियमितताले समस्या निम्याईरहेको बेला सौर्य उर्जाको व्यवस्थापन भएको र यसले कैदिबन्दीको आवास गृह उज्यालो बनाउन ठुलो मदत गर्ने बताउनुभयो । 

यसैबिच कारागार कार्यालयले विद्यालयलाई कदर पत्र प्रदान गरेको छ । विद्यालयबाट महत्वपूर्ण सहयोग भएको भन्दै कार्यालयले कदर पत्रले सम्मान गरेको हो । 

सौर्य सेट हस्तान्तरण कार्यक्रममा प्रमुख जिल्ला अधिकारी कुलबहादुर जिसी, सशस्त्र प्रहरी नायब उपरीक्षक मदन धानुक, प्रमुख राष्ट्रिय अनुसन्धान अधिकृत चिरञ्जिवि बुढा मगर, प्रहरी निरीक्षक ऋषि पाठक, कारागार प्रशासक तारा बहादुर कुवँर लगायतको उपस्थिति रहेको थियो ।