घरबास नभएका नागरिकलाई वडा कार्यालयले दियो घर उपहार !

रुकुम पश्चिमको मुसीकोट नगरपालिका वडा नम्वर ५ को कार्यालयले घरबास नभएका विपन्न परिवारको घर निर्माण गरिदिएको छ । वडाका तीन जना घरबासविहिन विपन्न परिवारलाई घर निर्माण गरेर हस्तान्तरण समेत गरिएको छ । 

सोहि वडा निवासी ६४ वर्षीय हरिबहादुर बिक, ३७ वर्षीय भुपेन्द्र दमाई र ७० वर्षीय शेरबहादुर गोर्खालीलाई वडा कार्यालयले घर उपहार दिएको वडा अध्यक्ष समिर जङ्ग मल्लले जानकारी दिनुभयो । उहाँका अनुसार तीन विपन्न परिवारलाई दुई कोठे भूकम्प प्रतिरोधी घर निर्माण गरेर हस्तान्तरण गरिएको हो । एक घर निर्माणमा वडा कार्यालयले तीन लाख ३० हजार रुपियाँ लगानी गरेको छ । 

वडा अध्यक्ष मल्लले आफ्नो जग्गाधनी पूर्जा भएर पनि घर नभएकाहरुको लगत संकलन गरेर वडा कार्यालयले घर निर्माण गरिदिएको जानकारी दिनुभयो । पहिलो चरणमा तीन जनाको आवास बनाईएको र वडामा अझै अन्य १, २ परिवार घरबासविहीन रहेकाले अर्को वर्ष समेत यस कार्यक्रमलाई निरन्तरता दिने वडा अध्यक्ष मल्लले उल्लेख गर्नुभयो । वडाका विपन्न परिवारलाई पनि आफ्नै घरको छानामुनि ल्याउने सोच रहेको मल्लको भनाई छ ।

मङगलबार हरिबहादुर र भुपेन्द्रको घर नगर प्रमुख महेन्द्र केसीले हस्तान्तरण गर्नुभएको हो भने यस अघि शेरबहादुरको घर हस्तान्तरण भईसकेको छ । विपन्न परिवारलाई घर हस्तान्तरण कार्यक्रममा नगर प्रमुख केसीले वडा कार्यालयले घरबासविहीनलाई घर बनाइदिएर उदाहरणीय काम गरेको बताउनुभयो ।

उहाँले बर्षौदेखि अर्काको घरमा साहारा मागेर बस्दै आउनुभएका तीन परिवारलाई सुरक्षित आवास बनाइदिएर वडाले सह्रानीय काम गरेको उल्लेख गर्नुभयो । नगर प्रमुख केसीले घर निर्माणपश्चात शौचालय, खानेपानी, लत्ताकपडा लगायत अन्य सामग्री पनि आवश्यक पर्ने भएकाले नगरपालिकाले सहयोग गर्ने प्रतिबद्धता जनाउनुभयो ।

घर पाएपछि हरिबहादुरले आफ्नै घर पाउँदा खुसी लागेको बताउनुभयो । यसअघि उहाँ श्रीमती, छोरी र नातिनीको साथमा भारत बस्दै आउनुभएको थियो । हरिबहादुरले जन्मस्थानमा आउँदा घर नै नभएपछि परदेशमा बस्नुपरेको बाध्यता रहेको र अब वडा कार्यालयले घर बनाईदिएपछि ढुक्कले यतै बस्ने बताउनुभयो ।

अर्का लाभान्वित भुपेन्द्रले गरिबको सहारा वडा कार्यालय बनेको बताउनुभयो । एकल पुरुष समेत रहनुभएका उहाँले यस अघि छिमेकीको भत्किएको गोठमा सहारा लिएर दिनरात बिताउँदै आएको जानकारी दिनुभयो । वडा कार्यालयले दिएको घर जीन्दगीको ठुलो उपहार भएको उहाँको भनाई छ । 

जेष्ठ नागरिक शेरबहादुरले अरुकै घरमा बसेर ७० वर्ष बिताएको भएतापनि मर्ने बेलामा आफ्नै घरमा पाएको बताउनुभयो । उहाँले आफ्नै घरमा मर्न पाउने धोको अब पुरा हुने उल्लेख गर्नुभयो । 

वडा कार्यालयको लगानीमा निर्माण भएका आवासमा शौचालय, खाद्यन्न र खानेपानीको समस्या रहेको छ । वडा अध्यक्ष मल्लले आफूले लत्ताकपडा र खाद्यन्न सहयोग गर्ने बताउनुभयो । अन्य निकायले विपन्न परिवारहरुलाई सहयोग गर्न अत्यावश्यक रहेको उहाँको भनाई छ । 

घर हस्तान्तरण कार्यक्रममा नगर प्रमुख महेन्द्र केसी, प्रमुख प्रशासकीय अधिकृत मोहन प्रकाश गिरी, वडा नम्वर ५ का वडा अध्यक्ष समिर जंग मल्ल, वडा नम्वर ८ का वडा अध्यक्ष जय बहादुर थापा लगायको उपस्थिति रहेको थियो ।