मुसिकोटबाट बाँदरपानी जाँदै गरेको जीप दुर्घटना हुँदा ३ जना घाईते

रुकुम पश्चिमको त्रिवेणी गाउँपालिका वडा नम्वर २ को बाँदरपानी नजिकै जीप दुर्घटना भएको छ । 

जिल्ला सदरमुकाम मुसिकोट खलंगाबाट बाँदरपानी जाँदै गरेको लु १ ज १७०९ नम्वरको जीप शुक्रबार बेलुका ७ बजे दुर्घटना भएको हो । 

जिल्ला प्रहरी कार्यालयका अनुसार दुर्घटनामा परेर तीन जना घाईते भएका छन् । घाईते हुनेहरुमा मुसिकोट नगरपालिका ९ बस्ने ३० वर्षीय जय प्रकाश खड्का, त्रिवेणी गाउँपालिका २ बस्ने ३८ वर्षीया प्रभा पुन र रोल्पाको परिवर्तन गाउँपालिका ४ बस्ने १९ वर्षीया गीता ओली रहेको जिल्ला प्रहरी कार्यालयका सूचना अधिकारी प्रहरी निरीक्षक ऋषि पाठकले जानकारी दिनुभयो ।

उहाँका अनुसार तीनै जना घाईतेको शरिरका विभिन्न भागमा चोट लागेको छ भने अवस्था सामान्य रहेको छ । तीनै जनालाई उपचारको लागि मुसिकोट ल्याईएको छ । 

जिप मोडमा मोड्ने क्रममा ब्रेक फेल भएर सडकबाट करिब दुई सय मिटर तल खसेकाे प्रहरीको भनाई रहेको छ । दुर्घटनाको पुरा विवरण प्राप्त भएको छैन ।