चाईनाबगरमा मध्यपहाडी भासिदा बढ्यो जोखिम

लगातारको वर्षाको कारण गएको पहिरो र सडक नै भासिएपछि मध्यपहाडी राजमार्गको यात्रा जोखिमपूर्ण बनेको छ । 

वर्षाको कारण राजमार्गको विभिन्न स्थानमा पहिरो गएको छ भने सानीभेरी गाउँपालिका -१ चाईनाबगरमा सडक भाग भासिएको छ । वडाध्यक्ष टेकबहादुर पुनले सडकको बढी भाग भासिएर नदितर्फको भागमा मिसिएकोले सर्वसाधारणहरुको यात्रा डरलाग्दो बनेको बताउनुभयो । उहाँका अनुसार वडा नम्वर १ कै विभिन्न स्थानमा पहिरोसमेत झरेर सडकमा क्षति भएको छ । पहिरोसँगै माथिबाट झर्ने ढुङगाको कारण यात्रा जोखिमपूर्ण रहेको छ । 

भासिएको सडकमा एकतर्फि यातायातका साधनहरु सञ्चालन हुने गरेका छन् । भासिएको सडक हरेक दिन नदितर्फको भागमा खस्दै गएकोले सबै सडक भेरीनदिमा मिसिने डर रहेको वडाध्यक्ष पुनले बताउनुभयो । बिशेषगरी ठुला सवारी साधनहरु सञ्चालन गर्दा थप जोखिम रहेको छ । 

सडक डिभिजन कार्यालय चौरजहारीले सडकका विभिन्न भागमा खसेको पहिरो पन्छाएर रुकुम पश्चिम क्षेत्रको सडक नियमित सञ्चालन हुने गरेको जनाएको छ । कार्यालयका प्रमुख खुमबहादुर भण्डारी कालेखोला, सोताको जङगल, चाईनाबगर, लगायतका स्थानमा पहिरो नियमित आउने गरेकोले डोजर तयारी अवस्थामा राखेर पहिरो पन्छाउने गरिएको बताउनुभयो । भासिएको सडक भने तत्काल मर्मत गर्ने अवस्था नरहेको उहाँले जानकारी दिनुभयो । वर्षा रोकिएपछि उक्त स्थानमा सडक मर्मतको काम सुरु हुने उहाँको भनाइ छ । 

यसैबिच जिल्ला प्रशासन कार्यालय रुकुम पश्चिमले सडकको अवस्था बुझेर मात्र लामो दुरीको यात्रा गर्न र नदि किनारका बासिन्दालाई सतर्क रहन अनुरोध गरेको छ । प्रमुख जिल्ला अधिकारी निशानराज गौतमले बाढी पहिरोको कारण सडकको अवस्था कमजोर बनेको, पहिरोको जोखिम रहेकोले यातायात सञ्चालनको अवस्था बुझेर यात्रा गर्न आवश्यक रहेको बताउनुभयो ।

यसका साथै उहाँले नदि तथा खोलाहरुमा पानीको बहाव बढेकोले तटिय क्षेत्रमा सतर्कता अपनाउन आग्रह गर्नुभयो । उहाँले नदिमा दाउरा निकाल्ने, पौडी खेल्ने, माछा मार्ने लगायतका गतिविधि नगर्न सूचित गुर्नभयो ।