आन्दोलन फिर्ता भएसँगै त्रिवेणी गाउँपालिकाका सबै विद्यालयमा पठनपाठन नियमित

रुकुम पश्चिमको त्रिवेणीमा गाउँपालिमा विद्यालय कर्मचारी तथा बालविकास शिक्षक संघर्ष समितिले सुरु गरेको आन्दोलनका कार्यक्रम फिर्ता लिएको छ । आन्दोलन फिर्ता लिएसँगै आजबाट गाउँपापलिका भित्रका सबै सामुदायिक विद्यालयमा पठनपाठन नियमित भएको छ । 

पारिश्रमिक कटौतीको बिषयमा संघर्ष समितिले हिजो बिहिबार देखि विद्यालयको पठनपाठन बन्द गरेर गाउँपालिकमा धर्नाको कार्यक्रम सुरु गरेको थियो । बिहिबार बेलुका गाउँपालिका र संघर्ष समिति बिच ३ बुँदे सहमति भएपछि सबै आन्दोलनका कार्यक्रम फिर्ता लिएको संघर्ष समितिका संयोजक कृपाराम पुनले जानकारी दिनुभयो । 

गाउँपालिका अन्तर्गतका विभिन्न विद्यालयमा कार्यरत विद्यालय सहायक, विद्यालय सहयोगी कर्मचारी तथा बालविकास शिक्षकको पारिश्रमिकसम्बन्धी विवादमा सहमति भएको हो । गाउँपालिकाका अध्यक्ष गणेश कुमार केसी र संघर्ष समिति संयोजक कृपाराम पुनले सहमति पत्रमा हस्ताक्षर गर्नुभएको छ।

सहमती पत्रमा त्रिवेणी गाउँपालिकाअन्तर्गतका सामुदायिक विद्यालयमा कार्यरत संघीय अनुदानअन्तर्गतका विद्यालय सहायक, विद्यालय सहयोगी कर्मचारी तथा प्रारम्भिक बालविकास शिक्षकलाई गाउँपालिकाले यसअघि उपलब्ध गराउँदै आएको पारिश्रमिक रकम संघीय शिक्षा ऐनमा अन्य व्यवस्था नभएसम्म निरन्तरता दिने उल्लेख छ।

त्यसैगरी संघीय अनुदान प्राप्त गर्ने बालविकास शिक्षकले विद्यालयमा बिहान १० बजेदेखि बेलुका ४ बजेसम्म काम गर्नुपर्ने  र संघर्ष समितिले गर्दै आएको आन्दोलनका सम्पूर्ण कार्यक्रम फिर्ता लिई विद्यालयमा उपस्थित भई नियमित कामकाजमा फर्किने सहमति भएको छ ।