रुकुमको जेठो विद्यालय ७५औ वर्षमा प्रवेश

रुकुम पश्चिमको मुसिकोट नगरपालिका -१ खलंगास्थित त्रिभुवन जनता माध्यमिक विद्यालय ७५ वर्षमा प्रवेश गरेको छ । वि.सं. २००९ सालमा स्थापित यस विद्यालयले विभिन्न कार्यक्रम गरि ७४औ बार्षिकोत्सव मनाइरहेको छ । 

यस अवसरमा बिद्यालय स्तरमा विभिन्न प्रतियोगिताहरु सञ्चालन गरिएको छ भने बार्षिकोत्सव बिशेष औपचारिक कार्यक्रम गरिएको छ । जिल्ला सदरमुकाम मुसिकोट खलंगा बजार परिक्रमा गरेर ¥याली निकालेपछि औपचारिक कार्यक्रम सञ्चालन गरिएको विद्यालयका निमित्त प्रधानाध्यापक पूर्णबहादुर केसीले जानकारी दिनुभयो । 

विद्यालय व्यवस्थापन समितिका अध्यक्ष गणेश के.सी अध्यक्षमा भईरहेको कार्यक्रममा नगर प्रमुख महेन्द्र केसीको प्रमुख आतिथ्यता र पूर्व राज्यमन्त्री गोपाल जी जंग शाहको बिशेष आतिथ्यता रहेको छ । कार्यक्रममा विभिन्न राजनीतिक दलका प्रमुख एवम् प्रतिनिधिहरु लगायतको सहभागिता रहेको छ । 

बार्षिकोत्सव बिशेष कार्यक्रमको सन्दर्भमा विभिन्न गीत तथा नृत्यका साथै स्काउट, तेक्वान्डो, कराँते लगायतका गतिविधिहरु प्रस्तुत भईरहेका छन् । यस अघि विद्यालयका छात्र तथा छात्राहरु बिच भलिबल, वक्तृत्वकला, हाइजम्प, जङजम्प लगायतका प्रतियोगिताहरु सम्पन्न गरिएको बिद्यालयका शिक्षक शेरबहादुर खड्काले जानकारी दिनुभयो । 

उहाँका अनुसार रसुवाको भोटेकोशी बाढीमा आएको बाढीले देश नै शोकमा रहेको बेला भव्य कार्यक्रम नगरेर विद्यालयस्तरिय कार्यक्रमहरु मात्र सञ्चालन गरिएको हो । बार्षिकोत्सव बिशेष कार्यक्रमको अवसरमा गत वर्ष एसइई परिक्षामा कर्णालीमै उत्कृष्ट स्थान ल्याउने यस विद्यालयका १० जना  विद्यार्थीहरुलाई सम्मानसहित पुरस्कार प्रदान गरिएको छ । 

शिक्षक खड्काले ४ जिपिए ल्याउने चार जनालाई नगद पाँच/पाँच हजार र ३.६१ जिपिए ल्याउने ६ जना बिद्यार्थीहरुलाई नगद तीन/तीन हजार नगद पुरस्कारका साथ सम्मान गरिएको जानकारी दिनुभयो । कार्यक्रमको सञ्चालन शिक्षक डम्बर खड्काले गर्नुभएको छ ।