त्रिवेणीमा सामुदायिक विद्यालयको पठनपाठन अनिश्चितकालका लागि बन्द

रुकुम पश्चिमको त्रिवेणी गाउँपालिका अन्तर्गतका सामुदायिक विद्यालयहरुमा आज देखि अनिश्चितकालका लागि पठनपाठन बन्द गरिएको छ ।  

गाउँपालिकामा रहेको विद्यालय कर्मचारी तथा बालविकास शिक्षक संघर्ष समितिले गाउँपालिकाले दिदैं आएको सेवा सुविधा कटौती गरेको भन्दै विद्यालयको पठनपाठन बन्द गरेको हो । 

संघर्ष समितिका संयोजक कृपाराम पुनका अनुसार गाउँपालिकाका विभिन्न विद्यालयमा कार्यरत बालविकास सहजकर्ता, विद्यालय सहायक कर्मचारी र विद्यालय सहयोगीलाई पालिकाले दिदैं आएको तलबमा तीन हजार रुपियाँ काट्ने निर्णय गरेपछि आन्दोलनका कार्यक्रम सुरु गरिएको हो । 

उहाँका अनुसार यस अघि संघीय सरकारबाट प्राप्त हुने अनुदानबाट पाउने रकममा गाउँपालिकाले थप गरेर तलब खुवाउने गरेको थियो । उहाँका अनुसार अघिल्लो आर्थिक वर्षसम्म विद्यालय सहायकको लागि १५ हजार, बालविकास सहजकर्ताको लागि १२ हजार र कार्यालय सहयोगीलाई दश हजार रुपियाँ संघीय सरकारबाट प्राप्त हुने गरेको थियो । सोही सुविधामा गाउँपालिकाले समपुरक अनुदानबाट विद्यालय सहायकलाई आठ हजार पाँच सय र बालविकास सहजकर्ता र विद्यालय सहयोगीलाई सात/सात हजार रुपियाँ थप गरेर तलब सुविधा दिने गरेको थियो ।

संघीय सरकारले चालु आर्थिक वर्षदेखि यी तिनै पदमा कार्यरत शिक्षक तथा कर्मचारीहरुलाई साविक दिदै आएको अनुदानमा पाँच हजार रकम थप गरेको छ । संघर्ष समितिका संयोजक पुनले संघीय सरकारले पाँच हजार अनुदान थप गरेपछि गाउँपालिकाले दिदै आएको अनुदानमा तीन हजार काट्ने शिक्षा समितिले निर्णय गरेपछि उक्त निर्णयको बिरुद्धमा आन्दोलनमा उत्रिएको बताउनुभयो ।

उहाँका अनुसार यो सँगै त्रिवेणी गाउँपालिकाले यस आर्थिक वर्षमा करार सेवा कर्मचारीहरुको तलब सुविधामा एक हजार पाँच सय रुपियाँ बढाउने निर्णय गरेको उक्त सुविधा पनि माग गरिएको बताउनुभयो । 

उहाँका अनुसार त्रिवेणी गाउँपालिकामा ११ जना विद्यालय सहायक कर्मचारी, ३६ जना बालविकास सहजकर्ता र ४५ जना विद्यालय सहयोगीहरु कार्यरत हुनुहुन्छ । स्थानीय सरकारको शिक्षा समितिबाट भएको उक्त निर्णय सच्चाएर पालिकाले दिदै आएको समपुरक अनुदान कटौती नगर्न आजैबाट गाउँपालिकाको कार्यालयमा धर्ना समेत सुरु गरेको उहाँले जानकारी दिनुभयो । 

यस बिषयमा त्रिवेणी गाउँपालिकाका वरिष्ठ शिक्षा अधिकृत मानबहादुर विश्वकर्माले गाउँपालिका अन्तर्गतका बालविकास केन्द्रमा कार्यरत बालविकास सहजकर्ता, विद्यालय सहयाक कर्मचारी र विद्यालय सहयोगीहरुको थप पारिश्रमिकको मागका बिषयमा गाउँपालिकाको ध्यानाकर्षण भएको बताउनुभयो ।

उहाँले असोज १ गते देखि अनिश्चितकालका लागि आह्वान गरेको विद्यालयको पठनपाठन बन्दको कार्यक्रम फिर्ता लिन र वार्ता र संवादको माध्यामबाट समस्या समाधान गर्न अनुरोध गर्नुभयो । गाउँपालिकाले शिक्षा समितिले गरेको उक्त निर्णय कार्यपालिका बैठकमा पेश भएपछि आवश्यक निर्णयमा जाने बताएको छ ।