सानीभेरीमा विपदका बिषयमा केन्द्रित भएर बाल दिवस मनाईयो

रुकुम पश्चिमकाे सानीभेरी गाउँपालिका वडा नम्बर ११ मा ६२ औँ राष्ट्रिय बाल दिवस २०८३ विभिन्न विपद् केन्द्रित कार्यक्रम आयोजना गरी मनाइएको छ। वडा कार्यालयको आयोजनामा श्री जनकल्याण माध्यमिक विद्यालय बागखोरमा विभिन्न प्रतियोगितात्मक कार्यक्रम सहित बाल दिवस मनाइएको हो।

बालबालिकाको अधिकारको सम्मान, संरक्षण, संवर्द्धन तथा प्रवर्द्धन गर्दै बालमैत्री वातावरण निर्माण गर्ने उद्देश्यले हरेक वर्ष बालबालिका केन्द्रित कार्यक्रम आयोजना गर्दै आएको वडाले यस वर्ष भने विपद् जोखिम न्यूनीकरण र पूर्वतयारीलाई मुख्य विषय बनाएको हो।

गत भदौ १० गते भोटेकोशी हुँदै त्रिशूली नदीमा आएको विनाशकारी बाढीबाट रसुवा, नुवाकोट, धादिङलगायतका जिल्लामा ठूलो धनजनको क्षति भएको घटनाबाट पाठ सिक्दै बालबालिकालाई विपद् जोखिम पहिचान तथा पूर्वतयारीबारे सचेत गराउने उद्देश्यले यस वर्षको बाल दिवसलाई विपद् केन्द्रित गरिएको वडा अध्यक्ष भूपालसिङ ओलीले बताउनुभयो।

दिवसका अवसरमा ‘विपद् जोखिम न्यूनीकरणमा सरोकारवालाको भूमिका’ विषयमा वक्तृत्वकला, विपद्सम्बन्धी लोकगीत तथा निबन्ध प्रतियोगिता आयोजना गरिएको थियो। यस्तै, हाजिरीजवाफ, हिज्जे, गणित दौड, पठन सीप, सम्झना खेल, लङजम्प, हाइजम्प र कुर्सी खेललगायतका प्रतियोगिता पनि सञ्चालन गरिएको अध्यक्ष वलीले बताउनुभयो।

प्रतियोगितामा प्रथम, द्वितीय, तृतीय र सान्त्वना स्थान हासिल गर्ने छात्रछात्रालाई पुरस्कार तथा प्रमाणपत्र वितरण गरिएको थियो। कार्यक्रममा वडाका विभिन्न विद्यालयमा अध्ययनरत बालबालिकाको सहभागिता रहेको थियो।

बाल दिवसकै अवसरमा वडाका विभिन्न विद्यालयमा अध्ययनरत गरिब तथा विपन्न छात्रछात्रालाई शैक्षिक सामग्रीसमेत वितरण गरिएको वडा अध्यक्ष ओलीले जानकारी दिनुभयो।