उपभोक्ताबाट गुनासो आएपछि रुकुम पश्चिमका स्थानीय तहलाई बजार अनुगमन गर्न प्रशासनको  पत्र

रुकुम पश्चिमका विभिन्न स्थानहरुमा बजार अनुगमनको बिषयमा विभिन्न गुनासोहरु बढेपछि जिल्ला प्रशासन कार्यालयले अनुगमन कार्यलाई तिब्रता दिन थालेको छ । 

उपभोक्ता एवम् नागरिकबाट मौखिम तथा लिखित रुपमा निरन्तर गुनासो कार्यालयमा आएपछि प्रशासनले बिषयगत समितिलाई बजार अनुगमन गर्न निर्देशन दिनका साथै जिल्लाका ६ वटै पालिकालाई प्रभावकारी अनुगमनका लागि पत्राचार गरेको हो ।

प्रमुख जिल्ला अधिकारी निशानराज गौतमले बिषयगत क्षेत्रका कार्यालयहरुलाई दिएको निर्देशन पछि आजै दुई कार्यालयले बजार अनुगमन सम्पन्न गरेको जानकारी दिनुभयो । उहाँका अनुसार पशु अस्पताल तथा पशु सेवा कार्यालयले जिल्ला सदरमुकामको बागबजार आसपासका क्षेत्रमा रहेका मासु पसल र उद्योग तथा उपभोक्ता हित संरक्षण कार्यालयले पातुखोला आसपासका दैनिक उपभोग्य सामाग्रीहरु बिक्रि हुने पसलको अनुगमन सम्पन्न गरेको जानकारी दिनुभयो । 

आजै सहायक प्रमुख जिल्ला अधिकारी मानबहादुर ओलीले जिल्लाका ६ वटै स्थानीय तहलाई प्रभावकारी बजार अनुगमनको लागि पत्राचार गर्नुभएको छ । कार्यालयका बजार अनुगमनको सन्दर्भमा गुनासो प्राप्त भएको उल्लेख गर्नुहुँदै उहाँले प्रभावकारी अनुगमन र त्यसको प्रतिवेदनका लागि पत्राचार गरेको जानकारी दिनुभयो । 

उपभोक्ता संरक्षण ऐन, २०७५ को दफा २८ बमोजिम उपभोक्ताको अधिकार संरक्षणका लागि वस्तु तथा सेवाको आपूर्ति व्यवस्था, मूल्य, गुणस्तर, शुद्धता सम्बन्धिका बिषयमा अनुगमन गर्न आवश्यक रहेको प्रशासनले उल्लेख गरेको छ । उल्लेखित बिषयमा बजारको स्थलगत सुपरिवेक्षण तथा अनुगमन गर्नका लागि स्थानीय तहमा स्थानीय बजार अनुगमन समिति रहने व्यवस्था रहेको छ ।

सोही व्यवस्था बमोजिक स्थानीय तहमा गठित समितिले चाडपर्वलाई समेत मध्यनजर गरेर नियमित रुपमा स्थानीय तहको प्रभावकारी अनुगमन गर्न र सो को मासिक प्रतिवेदन प्रशासन कार्यालयमा पठाउन अनुरोध गरिएको छ ।