सानीभेरीमा जोखिममा रहेका २६ बालबालिकालाई सहयोग हस्तान्तरण

रुकुम पश्चिमको सानीभेरी गाउँपालिकाले जोखिममा रहेका २६ जना बालबालिकालाई शैक्षिक सामाग्री वितरण गरेकोछ । 

गाउँपालिकाले राष्ट्रिय बाल दिवस २०८३ को अवसरमा उक्त सहयोग उपलब्ध गराएको हो । “बालपनको रक्षा : भविष्यको सुरक्षा” भन्ने मूल नाराका बाल दिवस मनाईरहेको गाउँपालकाले ११ वटै वडाबाट छनोट गरेर २६ जनालाई शैक्षिक सामाग्री वितरण गरेको हो । 

सानीभेरी गाउँपालिकाका बालकल्याण अधिकारी मानविर ओलीका अनुसार जोखिममा रहेको बालबालिकाहरुलाई प्रति व्यक्ति चार हजार १६७रुपियाँ ५० पैसा बराबरको शैक्षिक सामाग्री वितरण गरिएको छ । 

सानीभेरी गाउँपालिकाको सामाजिक विकास समितिका संयोजक तथा वडा नम्वर ९ का वडा अध्यक्ष शेरबहादुर खड्काले उनीहरुलाई सामाग्री हस्तान्तरण गर्नुभएको हो । सहयोग प्राप्त गर्ने बालबालिकामा बुवा वा आमाको मृत्यु भएका, एक जना अभिभावकको मृत्यु भई आर्थिक रूपमा विपन्न रहेका, अभिभावकबाट अलग्गिएका तथा संरक्षणको समस्यामा रहेका बालबालिका रहेका छन् ।

प्रत्येक बालबालिकालाई एक थान झोला, सर्ट, पाइन्ट, तीन दर्जन कापी तथा २० वटा कलम वितरण गरिएको गाउँपालिकाले जनाएको छ। बालकल्याण अधिकारी ओलीले जोखिममा रहेका बालबालिकाको संरक्षण, शिक्षामा पहुँच तथा उनीहरूको भविष्य सुनिश्चित गर्न यस्ता सहयोगात्मक कार्यक्रमलाई निरन्तरता दिदै आएको जानकारी दिनुभयो ।