रोल्पाबाट पहिरोले बगाएर प्युठान पुर्‍याएका पाँच शवको सनाखत

प्यूठानमा भेटिएका पाँचवटै शवको सनाखत भएको छ ।

माडी र लुङ्ग्री खोलाको किनारमा भेटिएका शव रोल्पाको थबाङ गाउँपालिका –५ कोटलबारा क्षेत्रमा गएको पहिरोले बगाएर ल्याएका व्यक्तिहरूको रहेको जिल्ला प्रहरी कार्यालय प्यूठानका प्रमुख प्रहरी नायब उपरीक्षक नरहरि अधिकारीले जानकारी दिनुभयो ।

उहाँका अनुसार सनाखत हुनेमा थबाङ गाउँपालिका –५ कोटलबारा निवासी ७ वर्षीय अशोक पुन मगर, ३४ वर्षीय महेन्द्र घर्ती, ६६ वर्षीया मनि पुन मगर, ३४ वर्षीया विष्णु पुन र ८० वर्षीय बलबहादुर पुन मगर रहेका छन् । आफन्तले उनीहरूको शव पहिचान गरेका हुन् ।

बिहीबार बिहान स्वर्गद्वारी नगरपालिका –९ जुडापाटा, वडा नम्बर ३ किमिचौर र वडा नम्बर ४ गोठीबाङस्थित माडी खोलाको किनारमा तीनवटा शव फेला परेको थियो । त्यसपछि स्वर्गद्वारी नगरपालिका –५ सरोजास्थित लुङ्ग्री खोलाको किनार र माण्डवी गाउँपालिका –५ अर्दुसस्थित माडी खोलाको किनारमा थप एक–एक शव फेला परेको थियो ।

पाँचै जनाको शव प्राथमिक स्वास्थ्य केन्द्र भिङ्ग्रीमा राखिएको छ । पोस्टमार्टमपछि शव आफन्तको जिम्मा लगाइने प्रहरीले जनाएको छ ।