जिल्ला प्रशासन कार्यालयमा टोकन सिस्टम लागु

जिल्ला प्रशासन कार्यालय रुकुम पश्चिमले सेवा प्रवाहमा टोकन सिस्टम सुरुवात गरेको छ । छिटो, छरितो, विश्वसनीय र पारदर्शी सेवा प्रवाहको लागि टोकन प्रणाली कार्यान्वयनमा ल्याईएको प्रमुख जिल्ला अधिकारी निशानराज गौतमले जानकारी दिनुभयो । 

उहाँका अनुसार सेवा सुधार तथा नवप्रवद्र्धनात्मक कार्यक्रम अन्तर्गत यो सेवा सुरुवात गरिएको हो । सेवाग्राहीहरुलाई सेवा प्राप्ती बारेमा सहजता दिलाई विश्वसनियता बढाउन टोकन प्रणाली सुरु गरिएको हो । टोकन मेसिन सञ्चालन हुँदा ‘पहिला आउनेलाई पहिलो सेवा’को अवसर हुने उहाँले बताउनुभयो । 

प्रजिअ गौतमले टोकन प्रणालीका साथै कार्यालयमा जेष्ठ नागरिक, गर्भवती महिला, अपाङ्गता भएका व्यक्तिलाई प्राथमिता दिएर सेवा प्रवाह भईरहेको जानकारी दिनुभयो । कार्यालयमा सुरुवात गरिएका नवप्रवद्र्धनात्मक कामहरु बारेमा उहाँले भन्नुभयो, “राष्ट्रिय गानसँगै सेवाको सुरुवात हुन्छ, हामीले डिस्प्ले बोर्डमार्फत सेवा प्राप्तीको प्रक्रिया सार्वजनिक गरिरहेका छौ, हरेक दिन सेवाको विवरण सार्वजनिक गरेका छौ ।”

यसका साथै कार्यालयमा १२३४ नम्वरको टोल फ्रि नम्वर सञ्चालन गरिएको, विपद् कल सेन्टर सञ्चालन गरिएको, जिल्ला आपतकालिन कार्यसञ्चालन केन्द्र व्यवस्थित गरिएको उहाँले जानकारी दिनुभयो । सार्वजनिक सेवा प्रवाहको बारेमा गुनासो तथा सूचना आउने बित्तिकै समन्वय गरेर समस्या समाधान गर्ने गरिएको छ । 

जिल्ला प्रशासन कार्यालयका सूचना अधिकारी एवम् सहायक प्रमुख जिल्ला अधिकारी केशव प्रसाद ओलीले टोकन प्रणाली कार्यान्वयन हुँदा सेवामा पारदर्शीता र सेवाग्राहीमा विश्वासनियता बढेको बताउनुभयो । उहाँले नागरिकता, राहदानी, राष्ट्रिय परिचय पत्र र प्रशासन शाखामा अलग अलग टोकन सिस्टम सुरु गरिएको जानकारी दिनुभयो ।

आफूले सेवा लिने फाँटको टोकन नम्वर लिएपछि सेवाग्राहीहरु आफ्नो पालो आएको बेला फाँटमा पुग्ने गरेको उहाँले उल्लेख गर्नुभयो । यसका लागि फाँटको प्रवेश ढोकामा टोकन नम्वर देखिने डिस्प्ले राखिएको छ भने कम्प्युटर सिस्टमबाट नम्वर बोलाउने समेत व्यवस्था गरिएको छ । 

टोकन सिस्टमले सेवाग्राहीलाई सेवा प्राप्तीमा सहजता आएको त्रिवेणी गाउँपालिका -४ का टन्ठबिर खड्काले बताउनुभयो । उहाँले आफ्नो काम भएको फाँटको टोकन लिएपछि आफ्नो पालो कतिबेला आउला, कसैले फाईल तलमाथि पार्ला भन्ने शंका हटेको बताउनुभयो । यसले गर्दा फाँटमा हुने भिड समेत व्यवस्थापन भएको छ । उहाँले आफ्नो टोकन नम्वर बोलावट भएपछि गएर सजिलै सेवा पाएको जनाउनुभयो ।