स्वयंसेवक र शिक्षक नायकहरूका लागि क्षमता अभिवृद्धि तालिम 

‎रुकुम पश्चिमको सानीभेरी गाउँपालिकास्थित सिम्लीमा पालिका स्तरिय स्वयंसेवक ब्यूरो तथा शिक्षक नायक एवं सहशिक्षक नायकहरूका लागि क्षमता अभिवृद्धि तालिम सम्पन्न भएको छ।

‎सानीभेरी गाउँपालिका र नेपाल रेडक्रस सोसाइटी रुकुम पश्चिम जिल्ला शाखाको संयुक्त साझेदारीमा दिगो  विकासका  लागि स्वास्थ्य अनुकूलन तथा  उत्थानसिलता (सुधार) परियोजनाको आयोजनामा उक्त तालिम सञ्चालन गरिएको हो।

‎साउन ६ गते देखि सुरु भएको तालिम ९ गते सम्म सञ्चालन भएको हो । स्वयंसेवक र शिक्षक नायक, सहायक नायकहरूको कार्यक्षमता विकास गर्ने तथा मानवीय सेवा र विपद् व्यवस्थापनका क्षेत्रमा प्रभावकारी रूपमा परिचालन गर्ने उद्देश्य राखिएको हो। चार दिन सम्म चलेको यस तालिममा विभिन्न विषयगत क्षेत्रमा विज्ञहरूले सहजीकरण गरेको सुधार परियोजनाका संयोजक यदु कुमार आचार्यले जानकारी दिनुभएको छ।

‎उहाँका अनुसार शिक्षक नायक तथा सहायक नायकहरुलाई रेडक्रसको पृष्ठभूमि, रेडक्रसका सिद्धान्त, विद्यालयमा जुनियर रेडक्रस सर्कल गठन प्रक्रिया, शिक्षक नायक र सहायक नायकको भुमिका, तीन तारे विद्यालयको  अवधारणा बनाउन गरिने कार्य, सुचक तथा विपद शब्दावली तथा त्यसमा गरिने कार्य लगाएका विषयहरुमा शिक्षकहरुलाई क्षमता अभिवृद्धि गरिएको तालिम प्रशिक्षक शंकर भट्टराईले जानकारी दिनुभएको छ ।

‎तालिममा ‎सानीभेरीका १३ वटा माध्यमिक विद्यालयका शिक्षक नायक र सहायक नायक गरि २६ जना सहभागी रहेको थियो । स्वयंसेवक व्यरो र शिक्षकहरुलाई अलग अलग स्थानमा तालिम दिईएको हो । स्वयंसेवकलाई विपद् तथा प्रकोपमा कसरी उद्वार, खोज कार्य र प्राथमिक उपचार दिने लगाएतका विषयमा प्रयोगात्मक रुपमा तालिम दिएको रेडक्रसले जानकारी दिएको छ ।