रुकुम पश्चिमका दुर्गममा रहेका मतदानस्थलहरुको स्थलगत अनुगमन 

रुकुम पश्चिममा जिल्ला सुरक्षा समितिको अगुवाईमा मतदानस्थलहरुको स्थलगत अनुगमन भईरहेको छ । अनुगमन टोलीले भौगोलिक रुपले टाढा र विकटमा रहेका तथा सुरक्षा संवेदनशीलता बर्गीकरण गरिएका मतदानकेन्द्रको स्थलगत अनुगमन गरेको हो । 

बिहिबार डोल्पाको सिमानामा पर्ने मतदानस्थलमा पुगेर मतदानस्थलको अनुगमन गरिएको छ भने अति संवेदनशील मतदान केन्द्रमा पर्ने आठबिसकोट नगरपालिका वडा नम्वर १, २ र ३ का मतदानस्थलहरु भौगोलिक अवस्थिति आकलन गरिएको छ । यस अघि जिल्लाका अन्य स्थानमा रहेका मतदानस्थलहरुको समेत नियमति अनुगमन भईरहेको बताईएको छ । 

आगामी फागुन २१ मा हुने प्रतिनिधीसभा सदस्य निर्वाचनका सुरक्षाका हिसाबले बर्गीकरण गरिएका मतदानस्थलहरुमा मध्य अति संवेदनशील मतदान केन्द्र तथा स्थललाई बिशेष चासो दिईएको जिल्ला सुरक्षा समितिका अध्यक्ष एवम् प्रमुख जिल्ला अधिकारी दिनेशप्रसाद थानीले जानारी दिनुभयो ।

सबै मतदान केन्द्रहरुको स्थलगत अनगुमनलाई तिब्रता दिईरहेको र अति संवेदनशील मतदान केन्द्रहरुमा बिशेष चासो दिएको उहाँले बताउनुभयो । छ स्थानीय तह रहेको यस जिल्लाका ७३ वडामा ७६ वटा मतदान स्थल तथा १४० वटा मतदान केन्द्ररहेका छन् । जसमध्य २१ वटा मतदानस्थल भने अति संवेदनशील सूचिमा छन् । त्यसैगरी ४३ वटा मतदानस्थल संवेदनशील र १२ वटा मतदानस्थल सामान्य सूचिमा रहेका छन् । 

प्रजिअ थानीले सुरक्षा जोखिमका हिसाबले मतदानस्थलको वर्गीकरण गर्ने गरिएको र जिल्लामा सामान्यको तुलनामा धेरै मतदानस्थल अति संवेदनशील र संवेदनशील सूचिमा रहेको जनाउनुभयो । आठबिसकोट नगरपालिका १, २ र ३ वडामा रहेका तीन मतदान केन्द्र भौगोलिक विकटता र सुरक्षाको हिसाबले अति संबेदनशील रहेकोले मतपेटिका संकलन गर्न हेलिकोप्टरबाट उपयुक्त हुने राय माथिल्लो निकायमा दिईएको प्रजिअ थानीले उल्लेख गर्नुभयो । यी स्थानहरुमा सहज यातायात र सञ्चारको सेवा छैन भने हिमपातको कारण आउआउमा कठिनाई हुने गर्दछ । 

मुख्य निर्वाचन अधिकृत तथा जिल्ला न्यायधीस दिपेन्द्र थापा मगर, प्रमुख जिल्ला अधिकारी, जिल्लाका सुरक्षा निकायका प्रमुखहरु, जिल्ला निर्वाचन अधिकारी लगायतको टोलीले भौगोलिक हिसाबले टाढा डोल्पाको सिमानामा रहेका, विकट क्षेत्रमा रहेका मतदान केन्द्रहरुको स्थलगत अनुगमन समेत गरेको हो । 

सो क्रममा स्थानीय तहका जनप्रतिनिधीहरु, राजनीनितक दलका स्थानीय कार्यकर्ता, विद्यालयका शिक्षक तथा सञ्चालक समिति, नागरिक समाज, युवा तथा गाउँका अगुवाहरु समेतसँग मतदान स्थलमा छलफल गरिएको जिल्ला निर्वाचन अधिकारी मोहनलाल केसीले जानकारी दिनुभयो ।

उहाँका अनुसार जिल्लाका विभिन्न स्थानहरुमा रहेका मतदानस्थलहरुमा नियमित अनुगमन गरिएको छ । जिल्ला सुरक्षा समितिले पनि स्थलगत रुपमा मतदानस्थलको सुरक्षाको लागि योजना बनाईरहेको उहाँको भनाइ छ ।