खानेपानी योजना बिग्रिएपछि लिउरेवारीका ९० घरधुरीलाई समस्या 

रुकुम पश्चिम चौरजहारी नगरपालिका -१४ मा रहेको लिउरेवारी खानेपानी योज‌नामा समस्या हुँदा स्थानीयवासी समस्यामा परेकाछन् । दुई महिना अघि बिग्रिएको योजनाको मोटर र कन्ट्रोलर हालसम्म पनि मर्मत नहुँदा यहाँका स्थानीयहरु खानेपानीको समस्यामा परेका हुन् । 

स्थानीय पहलबहादुर ओलीका अनुसार दुई महिनादेखि यहाँका ९० घरधुरी सर्वसाधारणले करिब तीन घण्टा टाढाबाट बोेकेर खानेपनीको जोहो गरिरहेका छन् । खानेपानी योजनामा आएको समस्या समाधानका लागि कसैले पनि चासो नदिएको उहाँको भनाइ छ ।  

लिउरेबारी सौर्य खानेपानी उपभोक्ता तथा सरसफाइ समितिका निवर्तमान सचिव वीर बहादुर ओलीका अनुसार आर्थिक वर्ष ०७६/०७७ देखि कर्णाली प्रदेश  स‌रकारको एक करोड २१ लाख वजेटमा यो योजनाको निर्माण कार्य सुरु भएको थियो । जनचाहना  निर्माण सेवाले उक्त योजना निर्माणका लागि ठेक्का पाएको थियो । दुई वटा  ५० घनलिटरका ट्याङकी, सोलार पाता, मोटर, कन्ट्रोलर, इन्टेक र  पाइप लाइन विस्तारको काम उक्त निर्माण कम्पनीले गरेको थियो। 

‎उक्त ठेक्काबाट काम पुर्ण रुपमा सम्पन्न हुन नसकेकाले २०७७ सालमा  लिउरेबारी सौर्य खानेपानी उपभोक्ता तथा सरसफाइ  समिति गठन गरेर थप काम अघि बढाएको  ओलीले जनाउनुभयो । 

पदम वहादुर के। सी।को अध्यक्षतामा गठन भएको सात सदस्यीय उक्तसमितिले खानेपानीको जग्गा खरिद देखि ९० घरधुरीमा मिटर र धारा समेत जडान गरेको थियो ।  यसका साथै खानेपानीको कार्यालय स्थापना, पाइपलाइन विस्तार समेतको काम गरेको निवर्तमान सचिव ओलीले जनाउनुभयो । 

‎उक्त योजनाको पूर्णताको लागि आर्थिक वर्ष ०८१/०८२ मा जिल्ला खानेपानी कार्यालय रुकुम पश्चिमको १५ घनलिटर र १० घनलिटरका दुईवटा ट्याङकी, एक ओटा इन्टेक र एक हजार एक सण् मिटर पाइपलाइन बिस्तार गरि खानेपानी वितरण समेत गरेको थियो । 

२०७७ सालमा गठन भएको उक्त समितिको कार्यअवधि सकिएको छ भने अहिले खानेपानीको मोटर र कन्ट्रोलरमा समस्या देखिएको छ । दुई महिनादेखि यहाँ खानेपानी आउन बन्द भएको छ । समितिको जिम्मा लिन उपभोक्ताहरुले आनाकानी गरेपछि समस्या समाधानको लागि पहलकदमी समेत पुगेको छैन ।