कालिका आविको नवनिर्मित भवन उद्घाटन

रुकुम पश्चिमको सानीभेरी गाउँपालिका ८ स्थित कालिका आधारभूत विद्यालय फुक्रुको नवनिर्मित चार कोठे भवनको उद्घाटन गरिएको छ।

सानीभेरी गाउँपालिका अध्यक्ष बिर्खबहादुर बिष्टले मंगलबार एक कार्यक्रमका बिच नवनिर्मित भवनको उद्घाटन गर्नुभएको हो । 

विद्यालयका प्रधानाध्यापक पुर्भान ओलीका अनुसार ‎कर्णाली प्रदेश सामाजिक बिकास मन्त्रालयको आर्थिक सहयोगमा भवन निर्माण गरिएको हो । ‎विद्यालयको भौतिक संरचना अभाव भई विद्यार्थीहरुको पठनपाठनमा समसया भएको बेला सामाजिक विकास कार्यालय मार्फत ३४ लाख १२ हजार ४७२ रकममा चारकोठे भवन निर्माण भएको हो । 

विद्यालय निर्माणको जिम्मा पाउनुभएका मुसिकोट नगरपालिका ४ का निर्माण ब्यवसायी वसन्त गिरीले नवनिर्मित भवन हस्तान्तरण समेत गर्नुभएको छ। नवनिर्मित भवनपछि विद्यार्थीहरुलाई सुरक्षित, आरामदायी र उपयुक्त कोठासहितको पठनपाठनले शैक्षिक गुणस्तरमा सुधार हुने अपेक्षा गरिएको छ । 

भवन उद्घाटन कार्यक्रममा विद्यालय व्यवस्थापन समितिका अध्यक्ष भुपालसिङ बिश्वकर्माको अध्यक्षयता र सानीभेरी गाउँपालिका अध्यक्ष  बिर्खबहादुर बिष्टको प्रमुख आतिथ्यता रहेको थियो ।

कार्यक्रममा सानीभेरी गाउँपालिका उपाध्यक्ष कमला रोका पुन, सामाजिक विकास कार्यालय रुकुम पश्चिम प्रमुख तुलाराज चौलागाईं, सानीभेरी गाउँपालिका वडा नव्म्वर ८ वडा अध्यक्ष प्रेमबहादुर बिक, विद्यालयका शिक्षक अभिभावक संघ संयोजक वीर बहादुर सार्की, वडा सदस्यहरु लगाएतको आतिथ्यता रहेको थियो । कार्यक्रमको सञ्चालन शिक्षक नरबहादुर नकालले गर्नुभएको थियो ।