खलङगामा पहिरो : विद्यतु लाईन अवरुद्ध, बहुतले पार्किङ भवनमा क्षति

रुकुम पश्चिमको जिल्ला सदरमुकाम मुसिकोट खलङगा बजारमा पहिरो गएको हो । लगातारको वर्षाको कारण आज बिहान खलङगास्थित सहिद गेटबाट तल्लोबजार जाने बाटो सडक पहिरोले भासिएको हो । 

सडकको एकभाग भासिदा सहिद मैदानमा निर्माणाधिन बहुतले भवनमा पहिरो र रुख परेको स्थानीय व्यवसायी खगेन्द्र रसाईलीले जानकारी दिनुभयो । उहाँका अनुसार पहिरो जाँदा विद्युत पोल समेत भाँचिएको छ भने विद्यतु तारमा क्षति भएको छ । 

जसको कारण आज दिनभर खलङगाको बिद्युत लाईन अवरुद्ध भएको छ । विद्युत लाईन सुचारु गर्नको लागि अर्को पोल गाडिएको छ भने तार तान्ने काम भईरहेको विद्युत वितरण केन्द्रले जानकारी दिएको छ । 

पहिरो र रुख निर्माणाधिन बहुतले भवनमा खस्दा भवनमा समेत क्षति भएको छ । पहिरोले त्यस स्थानमा आउजाउमा जोखिम रहेको छ । स्थानीयहरुले पहिरोको त्रास रहेको जनाएका छन् ।