भुक्तानीको अन्तिम दिन बाँफिकोटका ईन्जिनियर सम्पर्कविहिन

रुकुम पश्चिमको बाँफिकोट गाउँपालिकाका ईन्जिनियर सम्पर्कविहिन भएका छन् । 

आर्थिक वर्ष ०८१/०८२ को सरकारी कारोबारका लागि निकासा भुक्तानी तथा प्रणाली बन्द हुने दिनमा ईन्जिनियर नै सम्पर्कविहिन भएपछि पालिकाका विभिन्न योजनाहरुको भुक्तानीमा समस्या भएको छ । 

गाउँपालिकाका निमित्त प्रमुख प्रशासकीय अधिकृत लेखक खड्काका अनुसार ईन्जिनियर जितेन्द्र प्रसाद यादव हिजो मंगलबारका दिनदेखि सम्पर्कविहिन भएका छन् । 

असार २८ गतेका दिनदेखि साउन १२ गते सम्म बिदा स्वीकृत गराएका यादव २४ गतेदेखि नै पालिकाको सम्पर्कमा नरहेको खड्काले जानकारी दिनुभयो । महत्वपूर्ण समयमा ईन्जिनियर नै कार्यालयको सम्पर्क नरहेकोले कार्यालयको कामकाजमा समस्या भएको छ ।  

यस बिषयमा जिल्ला प्रशासन कार्यालयमा जानकारी गराईएको निमित्त प्रमुख प्रशासकीय अधिकृत खड्काले जनाउनुभयो । 

जानकारी अनुसार हिजो देखि नै यादवसहित अन्य प्राविधिक कर्मचारीहरु समेत गाउँपालिकाको कार्यालयमा उपस्थित भएका छैनन् । सेवाग्राहीहरुले कर्मचारी जिम्मेवारी पुरा नगरेर पन्छिन खोजेको र काम अनुसारको भुक्तानी नपाएको गुनासो गरेका छन् । 

केहि योजनाहरुको नापजाँच र भुक्तानीमा विवाद भएपछि ठेकेदार र उपभोक्ता समितिको दवाव थेक्न नसकेर प्राविधिकहरु पन्छिन खोजेको समेत बताईएको छ ।