सानीभेरीमा बालकले चलाएको साइकलको ठक्करबाट जेष्ठ नागरिकको मृत्यु

रुकुम पश्चिमको  सानिभेरी गाउँपालिका –७ फुक्रुमा एक जेष्ठ नागरिकको साइकलको ठक्करबाट मृत्यु भएको छ। 

सानीभेरी गाउँपालिका ७ का वडा अध्यक्ष कुलबहादुर बुढाथोकीका अनुसार शुक्रबार बेलुका सोही वडाका ७२ वर्षीय खर्कसिङ ओलीको साईकलको ठक्करबाट मृत्यु भएको हो । 

उहाँका अनुसार खेत जोतेर हलोजुवा बोकेर फर्कदै गरेका ओलीलाई एक १३ वर्षीय बालकले चलाएको साईकलले ठक्कर दिएपछि घटनास्थलमै मृत्यु भएको हो । 

जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक हरिप्रसाद पुनका अनुसार सोहि वडाका बालकले तिब्र गतिमा चलाएको साईकलले ठक्कर दिएपछि ओलीको मृत्यु भएको हो । अहिले ओलीको शव पोष्टमार्टमको लागि जिल्ला अस्पताल सल्लेमा ल्याईएको उहाँले जनाउनुभयो । घटनाको थप अनुसन्धान भईरहेको छ ।