बजेटमा समान अवसर हुनुपर्छ : गभर्नर पौडेल

नेपाल राष्ट्र बैंकका गभर्नर डा. विश्वनाथ पौडेलले सरकारी बजेटमा सबैको अवसर समान हुनुपर्ने बताउनुभएको छ । 

मौद्रिक नीति र लगानीको अवस्था लगायतका बारेमा जिल्लास्तरका सरोकारवालाहरुको राय संकलनको लागि रुकुमपश्चिमको जिल्ला सदरमुकाम मुसीकोट  आउनुभएका गर्भनर पौडेलले राष्ट्र बैंकको बजेट कसैको व्यक्तिगत नभएको र सबैको लागि समान रहेको बताउनुभयो । उहाँले बराबरी अवसर सबैमा रहेमा मात्र नेपालीको भविष्य सुनिश्चित हुने जनाउनुभयो । 

हालै सरकारबाट १८औ गभर्नरको रुपमा नियुक्त हुनुभएका पौडेलले नीतिगत निरन्तरता र थप सुधार आफ्नो प्राथमिकता रहेको बताउनुभयो । गभर्नर पौडेलले सम्पत्तिमा विविधिकरण हुनेपर्नेमा जोड दिनुभयो । शेयर बजार लगायतका एउटै क्षेत्रमा हौसिएर लगानी गर्नुभन्दा पनि लगानीको विविधिकरण भएमा चुर्लुम्म डुब्ने अवस्था नआउँने उहाँको भनाइ छ । 

गभर्नर पौडेलले किसानले भनेजस्तो कागज खेलाउने भन्दा पनि माटो खेलाउने प्रणलीको आवश्यकता रहेको बताउनुभयो । अन्तरक्रियामा उहाँले केहि साना  र कृषि उद्योगमा खराब लगानी भएको समेत उल्लेख गर्नुभयो । जिल्लाका विभिन्न बैंकहरुले कृषि क्षेत्रको लगानीमा समस्या रहेको जानकारी गराएपछि उहाँले लगानी गर्दा गल्ती नदोहोरिने गरेर सहि किसानलाई मात्र ऋण प्रवाह गर्नुपर्ने बताउनुभयो । उहाँले भन्नुभयो, ‘हामी आकाशबाट आएका होईनौ, नेपालकै किसानका सन्तान हौ, यहि देशको भविष्य देखेर केहि गरौ भन्ने भावनाका साथ जिल्लाका आएका छौ ।’

कार्यक्रममा नवनियुक्त गभर्नर पौडेलले सरकारको नीति तथा कार्यक्रमपछि आउने मौद्रित नीतिले पछाडी परेको वा पारिएको वर्गलाई अगाडि बढाउने प्रेरित गर्ने बताउनुभयो । 

कार्यक्रममा नेपाल राष्ट्र बैंकका कार्यकारी निर्देशक गुरु प्रसाद पौडेलले मौद्रित नीति तथा बजेटका सवालमा भएका नीतिहरु परिवर्तनको आवश्यकता रहेकोले जनस्तरको आवश्यकता ग्रहण गर्न जिल्लामा परिचालन भएको बताउनुभयो । बैंक तथा बित्तिय संस्थाहरुमा स्रोतको परिचालन, कृषि कर्जाको व्यवस्था, कृषि अर्थतन्त्रमा लगानीको अवस्था लगायतका बिषयमा सरोकारवालाहरुसँग छलफल गर्न थालेको उहाँले जानकारी दिनुभयो ।

कार्यक्रममा नार्कका कार्यकारी निर्देशक कृष्ण तिमिल्सेना, नार्कका वैज्ञानिक सुमित अर्यात लगायतको सहभागिता रहेको थियो । छलफलमा सहभागी जिल्लाका व्यवसायी, कृषि अगुवा, बैंकरहरुले कृषि उत्पादनमा सहि लगानी नभएको, सडकले नछोएको ठुलो र उर्वर कृषि भूमिमा लगानी हुन नसकेको, कृषि बजारमा बिचौलिया हाबी रहेको, राजमार्गका आसपासका जमिनमा उत्पादनका गतिविधिहरु हुन नसकेको लगायतका बिषय जानकारी गराउनुभएको थियो । कार्यक्रमको सहजीकरण प्रमु जिल्ला अधिकारी कुलबहादुर जिसीले गर्नुभएको थियो ।