आठबिसकोटको केन्द्र राडी बजारका सडक कालोपत्रे

रुकुम पश्चिमको आठबिसकोट नगरपालिकाको केन्द्र राडीबजारका विभिन्न सडकखण्ड कालोपत्रे गरिएको हो । 

यसअघि हिलाम्य र धुलाम्य अवस्थमा रहेको नगरपालिका केन्द्रको चार किलोमिटर सडक कालोपत्रे र आरसिसी गरिएको हो ।  संघीय शहरी विकास तथा भवन निर्माण कार्यालय सुर्खेतको सहयोगमा वडा नम्वर ९ स्थित पालिका केन्द्रको सडक कालोपत्रे हुनुका साथै व्यवस्थित बसपार्क समेत निर्माण भएको हो ।

कार्यालयका प्रमुख कमल दर्लामी मगरका अनुसार सघन शहरी विकास कार्यक्रम अन्तर्गत आठविसकोटमा एकिकृत शहरी पुर्वाधार विकास कार्य भएको हो । उहाँले उक्त कामका लागि गोर्खा मंगलदिप जेभी सुविधानगर काठमाडौले ठेक्का पाएको र तोकिएकै सयममा काम सम्पन्न भएको जानकारी दिनुभयो । उक्त निर्माण कम्पनीसँग २० करोड ५९ लाख ४६ हजार १४ रुपियाँमा काम सम्पन्न गर्ने गरी २०८० वैशाख १४ गते सम्झौता भएको थियो ।

अहिले राडीबजारको तल्लो बजार, सहिद स्मृति स्कुल सडक, क्याम्पस रोड सडकखण्डको नापी कार्यालय र पसाने, शहिद गेटसम्मको सडक कालोपत्रे भएको छ । चार किलोमिटर मध्य तीन हजार तीन सय मिटर कालोपत्रे र सात सय मिटर आरसिसी गरिएको छ । 

यसैगरी नगरपालिकाका केन्द्रदेखि भेरी करिडोर जोड्ने भेरी नदीको पुलसम्मको सडकमा कालोपत्रेको काम सकिएको छ । सडकसँगै नाला निर्माणको काम समेत पुरा गरिएको बताईएको छ । यसका साथै राडीबजारको ठाटीखोला नजिकै बसपार्क निर्माण काम पनि सम्पन्न भएको छ । बसपार्क, काउन्टर र शौचालय निर्माणको काम पुरा भएको कार्यालयले जानकारी दिएको छ । 

कालोपत्रेको काम भईरहेको बेला सम्पन्न अन्य कामको भुक्तानी नपाएपछि काम रोकिएको थियो । समयमै भुक्तानी भएको भए छ महिना अघि नै काम सम्पन्न भैसक्ने निर्माण कम्पनीले जनाएको छ । सडकको ट्रयाक खुलेको लामो समयसम्म सडक अलपत्र हुँदा नहुँदा स्थानीयले सास्ती बेहोर्नु परेको थियो ।

पालिकाको केन्द्रको सडक धुलाम्य र हिलाम्य हुँदा स्थानीयले दुःख पाउँदै आएका थिए । अब उक्त समस्या समाधान भएको नगर प्रमुख रबि केसीले बताउनुभयो । उहाँका अनुसार कामको जिम्मा पाएको निर्माण कम्पनीले समयमै काम सम्पन्न गरेर उदाहरणीय काम गरेको छ । 

अन्य कामको जिम्मा पाएका सबै निर्माण कम्पनीले समयमै काम गरेमा र नगरपालिकाले माग गरेको बजेट प्राप्त भएमा अबको दुई वर्षभित्र नगरपालिकाका सबै सडकहरु कालोपत्रे हुने उहाँको भनाई छ । नगर प्रमुख केसीले जनता अपेक्षा र जनप्रतिनिधिहरुले गरेका प्रतिबद्धताहरु पुरा हुन योजना अनुसार नै काम भईरहेको बताउनुभयो ।