तीन महिनापछि सल्लेमा नेपाल वायु सेवा निगमको उडान

रुकुम पश्चिमको मुसीकोट नगरपालिका –१ स्थित सल्ले विमानस्थलमा तीन महिनापछि नेपाल वायु सेवा निगमको उडान सुचारु भएको छ । गत पुस ३ गतेबाट बन्द भएको उडान शुक्रबारबाट नियमित भएको हो । 

नेपाल वायु सेवा निगम रुकुम शाखाका प्रमुख प्रेम ओलीका अनुसार तीन महिनापछि सल्ले विमानस्थलमा वायु सेवा निगमको उडान सुरु भएको हो । ओलीले पुसको पहिलो साता निगमको जहाजमा आएको खराबीको कारण उडान बन्द रहेको जनाउनुभयो ।

जहाज मर्मत तथा आवश्यक व्यवस्थापनपछि चैत २६ गते निगमको उडान तालिका तय भएको थियो । मौसम खराबीका कारण रद्ध भएको उडान शुक्रबार भएको छ । अब भने नियमित उडान हुने कार्यालय प्रमुख ओलीले जानकारी दिनुभयो ।  

अबदेखि हप्तामा दुई दिन नेपाल वायुसेवाको उडान तालिका कायम गरिएको छ । उहाँका अनुसार आईतबार काठमाडौंबाट रुकुम हुँदै नेपालगञ्ज र मङगलबार नेपालगञ्जबाट रुकुमहुँदै काठमाडौं उडान हुनेछ । नेपाल वायु सेवा निगमले रुकुम आउने तथा जाने टिकट अनलाईन सेवासँगै निगमको केन्द्रिय, क्षेत्रिय र जिल्लास्थित कार्यालयबाट लिन सकिने जनाएको छ । 

हप्तादिन अघि नै टिकट बिक्रि

सल्ले विमानस्थलमा नियमित उडान हुन थालेसँगै यात्रुको चाप बढेको कार्यालय प्रमुख ओलीले जानकारी दिनुभयो । उहाँले उडान भएको दिनमै अर्को हप्ता हुने उडानको टिकट बिक्रि भईसक्ने बताउनुभयो ।

बिरामी र सरकारी सिट बाँकि राखेर अन्य कोटाका टिकट पहिला नै बिक्रि हुने उहाँले उल्लेख गर्नुभयो । उडान संख्या बढाउन आवश्यक रहेको उहाँको भनाई छ । यस विमानस्थलमा उडान अवरुद्ध भएपछि केहि समय तारा एयरको जहाजले उडान भरेको थियो । 

रुकुम पश्चिमकै चौरजहारीमा रहेको अर्को विमानस्थल भने करिब दश वर्ष यता बन्द अवस्थामा रहेको छ । २०७२ सालको भदौमा धावनमार्ग कालोपत्रेको काम सुरु भएपछि अनियमित भएको चौरजहारी विमानस्थल अहिले ठप्प रहेको छ । स्थानीयले विमानस्थल सुचारु गर्नुपर्ने माग गर्दै आएका छन् ।