आठबिसकोट जोड्ने मुख्य सडक अलपत्र, संघर्षमा उत्रिने नगरपालिकाको चेतावनी

रुकुम पश्चिमको आठबिसकोट नगरपालिकाको केन्द्र जोड्ने चिसापानी–राडीज्यूला सडक निर्माणको काम अलपत्र अवस्थामा रहेको छ । निर्माणको जिम्मा पाएको ठेकेदार कम्पनीले तोकिएको समयावधिमा काम नगर्दा नगरपालिकाको ‘लाईफलाईन’ मानिएको सडक अलपत्र परेको हो । 

पूर्वाधार विकास कार्यालयमार्फत भएको ठेक्का पाएको ठेकेदार कम्पनी पिएस जिएसएचसी जेभी काठमाडौंले सडक निर्माणको लागि सम्झौता भएको लामो समयसम्म पनि काम सुचारु नगर्दा सडक अलपत्र परेको हो ।

ठेकेदारको अटेरीले चार वर्षमा पनि आयोजनाको काम हुन नसकेको आठबिसकोट नगरपालिका प्रमुख रबि केसीले जानकारी दिनुभयो । उहाँका अनुसार सडक अलपत्र अवस्थामा हुँदा स्थानीयवासी, यात्रु तथा यातायात व्यवसायी समेतले सास्ती पाएका छन् । 

ठेकेदार कम्पनी र पूर्वाधार कार्यालय बिच २०७८ जेठ ३ गते ३३ करोड ४८ लाख ८९ हजार ८७३ रुपियाँमा आठबिसकोट नगरपालिका ११ चिसापानी देखि पालिकाको केन्द्र राडीबजार सम्मको ८ किलोमिटर सडक निर्माणसहित चिसापानी, राडी नदुवा मुसिकोट माछिमी सडक कालोपत्रेको लागि सम्झौता भएको थियो ।

निर्माण कम्पनीलाई नगरपालिकाको तर्फबाट समेत समयमै सडक निर्माणका लागि पटक पटक लिखित तथा मौखिक रुपमा अनुरोध गर्दा पनि अटेरी गरिरहेकोले पूर्वाधार विकास कार्यालयमा ध्यानाकर्षण पत्र समेत पेश गरिएको नगर प्रमुख केसीले जानकारी दिनुभयो । उहाँका अनुसार निर्माण व्यवसायीबाट काम गर्नुको साटो विभिन्न वहानामा म्याद थप गर्ने काम मात्र भएको छ । जसको कारण यो सडकखण्ड हुँदै आवातजावत गर्न दिनहुँ समस्या बढ्दै गएको छ । 

निर्माण व्यवसायीले समयमै काम नगर्दा आवागमन अवरुद्ध हुने गरेको, मर्मत सम्भारको क्रममा नगरपालिकाको लाखौ बजेट खर्च हुने गरेकोले निर्माणको जिम्मा पाएको ठेकेदारलाई तोकिएको समयमानै काम सम्पन्न हुने अवस्था सिर्जनाको लागि पूर्वाधार कार्यालयमा ध्यानाकर्षण पत्र पेश गरिएको नगरप्रमुख केसीले बताउनुभयो । ध्यानाकर्षण पत्रको वेवास्ता भएमा ठेकेदार कम्पनी र सम्बन्धित कार्यालयका बिरुद्ध नगरपालिकाले संघर्ष गर्ने चेतावनी समेत दिएको छ । 

पूर्वाधार विकास कार्यालयका अनुसार अहिलेसम्म ४० प्रतिशत मात्र भौतिक प्रगति भएको छ । कार्यालयको तर्फबाट तोकिएको समयमै काम सम्पन्न गर्न निर्देशन समेत गरिएको छ । कार्यालय प्रमुख रामचन्द्र बिसीले २०८२ जेठ २० गते भित्र काम सम्पन्न गरिसक्नुपर्ने सम्झौता रहेको जानकारी दिनुभयो । तोकिएको समयमा काम हुने सम्भावना भने न्यून रहेको बताईन्छ ।

सडक निर्माणको काम अलपत्र हुँदा आठबिसकोटबाट जिल्ला सदरमुकाम मुसीकोट, काठमाडौं, नेपालगञ्ज, दाङ, सुर्खेत जाने यात्रुहरुले सास्ती पाउने गरेका छन् । वर्षौसम्म बाटोको अवस्थामा सुधार नहुँदा स्थानीयले समेत दुख पाउदै आएको गुनासो गरेका छन् ।