भेरी नदिमा छोरा बेपत्ता, किनारमा आमाबाको बिलौना

सुर्खेतमा झोलुङ्गे पुल निर्माणको क्रममा रुकुम पूर्वका दुई युवा गत बुधबार दिउँसो भेरी नदिमा खसेर बेपत्ता भए । कामको खोजीमा रुकुम पूर्वको सिस्ने गाउँपालिका २ बाट सुर्खेत पुगेका युवा नदिमा बेपत्ता भएको खबरपछि बेपत्ताका आमाबासहित करिब ३०–३५ जना आफन्तजन भेरी नदि किनारमा पुगेका छन् । 

बेपत्ता भएका मध्य २४ वर्षीय अनिल घर्तीको शव बिहिबार फेला पर्यो । तर अहिलेसम्म पनि १८ वर्षीय अर्जुन झाँक्रि मगरको शव फेला परेको छैन । घर्तीको शव खसेको भन्दा ४० मिटरको गहिराईमा अड्किएको अवस्थामा फेला परेको हो । परिवारले अझैसम्म शव बुझेका छैनन् । 

भेरी नदिका दुई किनार जोड्ने पुलको लट्ठा तान्ने क्रममा दुई युवा भेरीमै खसे । यहि भेरी किनारमा चार दिन देखि बेपत्ता अर्जुनको खोजीमा उहाँका बुवाआमा र आफन्तजन भौतारिएका छन् । नदि किनारमा कान्छो छोराको सास भेटिने आशा मारेर बिनौला गरिरहेकी आमा गंगा झाक्रि बेलाबेला बेहोस बन्नुहुन्छ ।

नदिमा हाम्फाल्न खोज्नुहुन्छ, आफन्तले सम्हालेका छन् । आमा गंगा बर्बराउँदै भन्नुहुन्छ, ‘बिदेश जान्छु भन्दा देशमै काम गर भनेर जान दिएनौ, अहिले यो अवस्था आयो । छोरा कहाँ होला, कस्ले खोजिदेला ?’ उहाँको बिलौनाले साथमा रहनुभएका पति बेगबहादुर र आफन्तजन थप विक्षिप्त बनेका छन् ।

अर्जुनका बुवा बेगबहादुरले छोराको खोजीमा सरकारले लापरबाहि गरिरहेको गुनासो गर्नुभएको छ । छोरा खोजीपाउँ भन्दै बिन्ती गर्दा पनि सशस्त्र प्रहरीको गोताखोर टोली फर्किएर गएको उहाँको भनाई छ । सुर्खेतमै रहेको प्रदेश सरकार, संघ अन्तर्गतको प्रहरी संयन्त्रले रुकुमपूर्वको गरिब मान्छेको गुहार नसुनेको उहाँको भनाई छ । 

बेपत्ताका आफन्तको साथमै खोजी कार्यमा रहनुभएका रुकुमपश्चिमको आठबिसकोट नगरपालिका –१ का वडा अध्यक्ष देवबहादुर घर्तीले नदिमा हराएका युवा खोज्न सरकारले वेवास्ता गरेको बताउनुभयो ।

उहाँले पुल निर्माणको जिम्मा लिएको ठेकेदार समेतले अटेरी गर्दै पीडित परिवारको सम्पर्कमै नआएको बताउनुभयो । काम खोज्दै सुर्खेत पुगेको युवा नदिमा हराउँदा जिम्मेवार निकायले चरम लापरबाही गरेको र पीडित परिवारलाई थप पीडा भईरहेको उहाँको भनाई छ । 

सरकारले बेपत्ताको तत्कालै खोजी गर्नुपर्ने र उचित क्षतिपूर्ति दिनुपर्ने मृतक तथा बेपत्ताका आफन्तजनहरुको माग रहेको छ । चिसो सिरेठोमा छोराको बियोगमा तड्पिएका बुढाबुढीको स्वास्थ्य अवस्था समेत नाजुक बन्दै गएको बताईएको छ ।

सुर्खेतको बराहताल गाउँपालिका–४, कुटा र पञ्चपुरी नगरपालिका–१४, जोड्ने भेरी नदीमाथि झोलुङ्गे पुल निर्माणको काम गर्दै गरेका अनिल र अर्जुन भेरी नदीमा खसेर बेपत्ता भएका थिए ।