रुकुमका उत्कृष्ट किसानलाई मुख्यमन्त्री उत्कृष्ट कृषक पुरस्कार प्रदान 

कृषि विकास कार्यालय रुकुम पश्चिमले उत्कृष्ट कृषक तथा समुहलाई पुरस्कार सहित सम्मान गरेको छ । 

शनिबार भएको २१ औं राष्ट्रिय धान दिवस तथा रोपाई महोत्सव, २०८१ को अवसरमा तीन जना किसानलाई पुरस्कारसहित सम्मान गरिएको छ । 
मुसीकोट नगरपालिका –४ सोलाबाङमा सचेनामुलक ¥याली, हिले दौड, हिलोमा रस्साकस्सी र रोपाई कार्यक्रमसँगै उत्कृष्ट किसानलाई पुरस्कार प्रदान गरिएको ।  

कृषि विकास कार्यालयको बार्षिक स्वीकृत कार्यक्रम अनुसार मुख्यमन्त्री उत्कृष्ट कृषक पुरस्कारतर्फ जिल्लामा कृषि उत्पादनको क्षेत्रमा उल्लेख्यनिय कार्य गर्ने तीन जनालाई पुरस्कार प्रदान गरिएको छ ।

कार्यालयका निमित्त प्रमुख मिनबहादुर केसीका अनुसार मह तथा मौरी पालन व्यवसायमा उत्कृष्ट कार्य गर्न बाँफिकोट गाउँपालिका –१ का किसान महेन्द्र मल्ल प्रथमलाई प्रथम पुरस्कार प्रदान गरिएको छ ।

त्यसैगरी फलफूल उत्पादनतर्फ आठविसकोट नगरपालिका –२ का किसान कृष्णबहादुर यरीले द्वितीय र बिउ उत्पादनतर्फ चौरजहारी नगरपालिका –३ स्थित ताजा तरकारी तथा बिउ उत्पादन कृषक समुहले तृतीय स्थान प्राप्त गर्न सफल भएका छन् । उहाँहरुलाई क्रमशः ४० हजार, ३० हजार र २० हजार नगदसहित प्रमाणपत्र उपलब्ध गराईएको छ ।  

उत्कृष्ट स्थान ल्याउन सफल किसान तथा समुहहरुलाई जिल्ला समन्वय समिति लुम्बिनी गौतम, मुसीकोट नगर प्रमुख महेन्द्र केसी र प्रमुख जिल्ला अधिकारी हरि प्रसाद पन्तले पुरस्कार तथा सम्मान पत्र प्रदान गर्नुभएको हो ।