हरियो रुखलाई बिद्युतको पाेल बनाएर मुसिकाेटका पाँच घरमा बिद्युत लाईन, स्थानीय त्रसित

रुकुम पश्चिमको जिल्ला सदरमुकाम क्षेत्रमै पर्छ, मुसिकोट नगरपालिका –१ को रावलबारा टोल । यहाँका स्थानीयले हरियो रुखलाई बिद्युतका पोल बनाएर बितरण गरिएको बिद्युत सुविधा उपयोग गरिरहेका छन् । 

हरियो रुखबाट बिद्युतको करेन्ट प्रवाह हुने जान्दाजान्दै बिद्युत कार्यालयले भिमल र बकैना जातको रुखमा बिद्युतको नाङगो तार जोडिदिएको छ ।घाँस र दाउराको प्रयोजनको लागि हुर्काईएको रुखमा बिद्युतको नाङगो तार राखेर करेन्ट प्रवाह भएसँगै यहाँका स्थानीय त्रसित भएका छन् ।  

स्थानीय भानु केसीले रुखमै बेरेर आएको बिद्युतको तारबाट टोलमा बिद्युत लाईन वितरण भएको बताउनुभयो । उहाँले उक्त स्थानका दुई वटा हरियो रुखलाई बिद्युतको पोलको रुपमा प्रयोग गरिएको जानकारी दिनुभयो । हावालाग्दा, रुख हल्लिदा झन् डर लाग्ने गरेको उहाँको भनाई छ । 

सोहि टोलकी मनिषा रावलले बिद्युत लाईन जोडिएका रुखहरुको नजिक जानै डर लाग्ने बताउनुभयो । ‘कहिलेकाँहि बालबच्चाहरु जान्छन् कि भन्ने ठुलो डर रहेको छ,’ रावलले भन्नुभयो, ‘बाध्यताले गर्दा टोलका सबैले रुखबाटै जोडिएको लाईनबाट बिद्युत सेवा लिनु परेको छ ।’

यहाँका पाँच घरमा जडान गरिएको बिद्युत सेवाको लागि दुई रुखलाई बिद्युतको पोल बनाईएको छ । स्थानीयहरुले पटक पटक बिद्युत कार्यालय समक्ष पोलको माग गर्दा सुनुवाई नभएको बताएका छन् । घर छेउमै रहेको रुखमा बिद्युतको नाङगो तार जोडिएपछि निर्धक्कका साथ आउजाउ गर्न समेत नसक्ने अवस्था रहेको बताईन्छ । 

बिद्युत वितरण केन्द्र रुकुम पश्चिमका प्रमुख शिवजी प्रसाद शाहले हरियो रुखमा नाङगो तार जोड्ने काम जोखिमपूर्ण रहेको बताउनुभयो । उहाँले त्यस विषयमा कार्यालयको तर्फबाट आवश्यक पहल गरेर तत्कालै समस्या समाधान गरिने उल्लेख गर्नुभयो ।

कार्यालय प्रमुख साहले रुखमा बिद्युतको नाङगो तार जोड्नु नै जोखिम बढाउने काम भएकोले त्यसो नगर्न समेत अनुरोध गर्नुभयो । 

पछिल्लो समय बिद्युतको करेन्टको कारण मृत्यु हुने, घाईते हुने, घर आगलागी हुने घटना समेत बढिरहेका छन् । जिल्ला प्रहरी कार्यालयका अनुसार बिद्युत पोलको करेन्टका कारण पछिल्लो वर्ष दुई जनाको मृत्यु समेत भएको तथ्याङक रहेको छ ।