इभि भ्यानको ठक्करबाट घाईते भएकी महिलाको मृत्यु

रुकुम पश्चिमको त्रिवेणी गाउँपालिका –१० भयराथानमा मंगलबार बेलुका इभि भ्यानको ठक्करबाट गम्भीर घाइते भएकी महिलाको उपचारको क्रममा मृत्यु भएको छ । 

त्रिवेणी गाउँपालिका –८ निवासी ६५ वर्षीया काली बिटालुको उपचारको क्रममा जिल्ला अस्पताल सल्लेमा मृत्यु भएको प्रहरीले जनाएको छ । जिल्ला प्रहरी कार्यालयका सूचना अधिकारी प्रहरी निरीक्षक झविन्द्र परियारका अनुसार हिजो बेलुका सोलाबाङबाट नुवाकोटतर्फ जाँदै गरेको बा.प्र.०८–००१ ज ०३८९ नम्बरको  इभि भ्यानले बाटोमा  हिँडिरहेकी बिटालुलाई ठक्कर दिएर गम्भिर घाईते बनाएको थियो। 

दुर्घटनापछि बिटालुलाई उद्धार गरेर जिल्ला अस्पताल ल्याईएकोमा उपचारको क्रममा मंगलबार नै मृत्यु भएको प्रहरी निरीक्षक परियारले जानकारी दिनभुयो । दुर्घटनापछि भ्यानका चालक फरार रहेका छन् । उनको खोजी भईरहेको प्रहरीले जनाएको छ ।

सहचालकलाई भने प्रहरीले नियन्त्रणमा लिएको छ ।