भेरी करिडोरमा मोटरसाइकल दुर्घटना, गम्भीर घाइतेलाई हेलिकप्टरमार्फत उद्धार 

भेरी करिडोर सडकखण्ड अन्तर्गत डोल्पामा मोटरसाइकल दुर्घटना हुँदा दुई जना युवा घाइते भएका छन् । घाईते मध्य एक जनालाई हेलिकप्टरमार्फत थप उपचारका लागि सुर्खेत लिइएको छ।

जिल्ला प्रहरी कार्यालय डोल्पाका प्रमुख प्रहरी नायब उपरीक्षक (डिएसपी) अनिलराज गिरीका अनुसार हिजो राति करिब साढे आठ बजे ठूलीभेरी नगरपालिका–९ खारखोलीस्थित भेरी करिडोर सडकखण्डमा दुनैबाट त्रिपुराकोटतर्फ जाँदै गरेको बा ४५ प ६४८६ नम्बरको मोटरसाइकल अनियन्त्रित भई सडकबाट करिब ४० मिटर तल खसेर दुर्घटना भएको थियो।

दुर्घटनामा मोटरसाइकल चालक जुम्ला जिल्लाको गुठीचौर गाउँपालिका–५ देक्पालगाउँ घर भई हाल डोल्पाको ठूलीभेरी नगरपालिका–३ दुनै बजारमा मोटरसाइकल ग्यारेज सञ्चालन गर्दै आएका २६ वर्षीय सर्जन नेपाली र मोटरसाइकलमा सवार ठूलीभेरी नगरपालिका–९ मोतिपुर निवासी २८ वर्षीय गोपाल नेपाली गम्भीर घाइते भएका थिए।

दुवै जनालाई तत्काल उद्धार गरी जिल्ला अस्पताल दुनैमा उपचारका लागि लगिएको थियो। चिकित्सकका अनुसार दुवैको अवस्था गम्भीर रहेको थियो । 

घाईते सर्जन नेपालीको अवस्था थप जटिल भएको र जिल्ला अस्पतालमा उपचार सम्भव नभएपछि आज नेपाली सेनाको एनए–०६१ नम्बरको हेलिकप्टर मार्फत उद्धार गरिएको डीएसपी  गिरीले जानकारी दिनुभयो । घाइतेलाई थप उपचारको लागि सुर्खेत लिइएको हो । 
प्रहरीका अनुसार दुर्घटनाग्रस्त मोटरसाइकल घटनास्थलमै रहेको छ भने दुर्घटनाबारे थप अनुसन्धान भइरहेको छ।