डाँगीमोड दुर्घटना अपडेट : घाईते आठ जना मध्य एकजनाको अवस्था गम्भिर (नामावलीसहित)

शुक्रबार बेलुका रुकुम पश्चिमको त्रिवेणी गाउँपालिका ६ डाँगीमोड स्थित राप्‍ती राजमार्गमा फोर्स गाडी दुर्घटना हुँदा घाईते हुनेको संख्या आठ पुगेको छ । घाइते मध्य एकजना अवस्था गम्भिर रहेको प्रहरीले जनाएको छ । 

दाङको तुलसीपुरबाट रुकुम पश्चिमको मुसिकोट खलङ्गातर्फ आउँदै गरेको लु २ ख ४९८० नम्बरको फोर्स अनियन्त्रित भई सडकमा पल्टिएर दुर्घटना भएको थियो । 

जिल्ला प्रहरी कार्यालयका प्रहरी नायब उपरीक्षक (डिएसपी) बेदबहादुर पौडेलका अनुसार घाइते हुनेहरुमा दाङको तुलसीपुर उपमहानगरपालिका १३ बस्ने वर्ष २७ का गाडी चालक चन्द्रबहादुर बि.क., रुकुम पश्चिम मुसिकोट नगरपालिका ८ बस्ने वर्ष २० की सुष्मा खड्का, उहाँका छोरा वर्ष ४ को हिमांशु घर्ती मगर, मुसिकोट नगरपालिका ११ बस्ने वर्ष २० की रिमा ओली, त्रिवेणी गाउँपालिका ७ मुरुडाँडा बस्ने वर्ष २० का विशाल पुन मगर, उहाँकी श्रीमती वर्ष २० की करिष्मा पुन मगर,  बाँकेको राप्‍ती सोनारी गाउँपालिका ७ बस्ने वर्ष ३० का मदन घर्ती र सल्यान बागचौर नगरपालिका बस्ने वर्ष ३२ का गाडी साहु कैलाश बि.क. रहनुभएको छ । 

घाइते मध्ये करिष्माको अवस्था गम्भीर रहेको अस्पतालले जनाएको छ । अन्य घाईतेहरुको अवस्था सामान्य रहेको छ । सबै घाइतेहरूको जिल्ला अस्पताल सल्लेमा उपचार भइरहेको प्रहरीले जनाएको छ ।