आठबिसकोटमा मोटरसाईकल दुर्घटना हुँदा दुई युवा घाईते

रुकुम पश्चिममा मोटरसाईकल दुर्घटनामा परेर दुई जना युवा घाईते भएका छन् । 

शुक्रबार बेलुका आठबिसकोट नगरपालिका वडा नम्वर १० को गिजा खहरेपिपल बोटस्थित भित्रि सडक खण्डमा भे ६ प ७७५० नम्वरको मोटरसाईकल दुर्घटना भएको हो । 

जिल्ला प्रहरी कार्यालयका अनुसार दुर्घटनामा परेर दुई जना युवा घाईते भएका छन् । प्रहरी नायब उपरीक्षक बेदबहादुर पौडेलले दुर्घटनामा परेर आठबिसकोट नगरपालिका ७ डाँफे निवासी मोटरसाईकल चालक २० वर्षीय सुवास बोहरा र सोही गाउँका १८ वर्षीय तिलक आर.सी. घाईते भएको जानकारी दिनुभयो ।

घाईते मध्य चालक बोहराको टाउकोमा चोट लागेकोले अवस्था गम्भिर रहेको छ भने आरसीको दाहिने खुट्टा र हातमा चोट रहेको छ । दुवै जनालाई आठबिसकोटस्थित नगर अस्पतालमा सामान्य उपचारपछि थप उपचारका लागि नेपालगञ्ज रिफर गरिएको छ । 

भ्याउने देखी राडी बजारतर्फ आउँदै गर्दा मोटरसाईकल अनियन्त्रित भई सडक भन्दा करिब आठ मिटर तल खसेर दुर्घटना भएको हो । दुर्घटनाको थप अनुसन्धान भईरहेको प्ररहीले जनाएको छ ।