रुकुमको सोलाबाङमा गाडी र अटो दुर्घटना हुँदा आठ जना घाईते (विवरणसहित)

शनिबार दिउँसो राप्ती राजमार्ग अन्तर्गत रुकुम पश्चिमको मुसिकोट नगरपालिका -४ सोलाबाङमा गाडी र अटो ठोक्किएर दुर्घटना हुँदा आठ जना घाईते भएका छन् । 

जिल्ला प्रहरी कार्यालय रुकुम पश्चिमका अनुसार दाङबाट रुकुम पूर्वका लागि आउँदै गरेको बा.प्र. ०६-००१ ख ०१४६ नम्वरको फोर्स डागी र खलंगाबाट सोलाबाङतर्फ जाँदै गरेको लु.प्र. ०२-००१ ह १३७८ नम्वरको अटो एक आसपमा ठोकिएर दुर्घटना भएको हो । 

जिल्ला प्रहरी कार्यालयका प्रहरी निरीक्षक हरि प्रसाद पुनका अनुसार दुर्घटनामा परेर आठ जना घाईते भएका छन् । घाईते हुनेहरुमा रुकुम पश्चिमको मुसिकोट नगरपालिका ५ सेरीगाउँ बस्ने अटो चालक २८ वर्षीय अर्जुन केसी, आठबिसकोट नगरपालिका ८ चुर्तिपाखा निवासी २२ बर्षीया बिमला बोहरा, सोहि स्थान निवासी अबिर महताराको छोरा ९ वर्षीय प्रवेश महतारा र सोहि वडाको दाजे निवासी ३२ वर्षीया सीता देवकोटा, उहाँको ८ वर्षीया छोरी स्मारिका देवकोटा, सोहि स्थान बस्ने तारा देवकोटाको ९ वर्षीय छोरा शिव देवकोटा घाईते हुनुभएको छ ।

त्यसैगरी बाँफिकोट गाउँपालिका ३ भाग्ले निवासी २६ वर्षीया गीता देवकोटा र उहाँको ५ वर्षीया छोरा एन्जिला देवकोटा पनि दुर्घटनामा परेर घाईते हुनुभएको छ । 

घाईते मध्य बिमला बोहराको टाउकोमा चोट रहेकोले अवस्था गम्भिर रहेको छ । घाईतेहरुलाई उपचारको लागि जिल्ला अस्पताल सल्लेमा लिईएको छ । गाडी चालक रुकुम पूर्वको भुमे गाउँपालिका ३ निवासी ४८ वर्षीय लालबहादुर श्रेष्ठलाई नियन्त्रणमा लिएको प्रहरीले जनाएको छ ।

गाडी र अटो ठोक्किदा अटो सडकबाट ३० मिटर तल खसेको बताईएको छ । घटनाको थप अनुसन्धान भईरहेको प्रहरीले जनाएको छ ।