शव बोकेर खोटाङ पुगेको हेलिकप्टर दुर्घटनाग्रस्त, एक यात्रु घाईते

काठमाडौँबाट शव बोकेर आएको हेलिकप्टर खोटाङमा दुर्घटना भएको छ । एयर डाइनेस्टीको हेलिकप्टर केपिलासगढी गाउँपालिका–२ खार्ताम्छाको बालाबेसीमा चैत ४ गते दिउँसो दुर्घटना भएको हो ।

बारीमा अवतरण गर्ने क्रममा हेलिकप्टर दुर्घटना भएको जिल्ला प्रहरी कार्यालय खोटाङले जनाएको छ । सुरुमा बारीको डिलमा अवतरण भएको हेलिकप्टर पुनः उठाएर बीचमा लैजान खोज्दा दुर्घटना भएको बताइएको छ । 

चालक सविन थापासहित ६ जना सवार हेलिकप्टर दुर्घटना हुँदा एक यात्रु काजीबहादुर राई घाइते हुनुभएको जिल्ला प्रहरी कार्यालय खोटाङका प्रमुख प्रहरी नायब उपरीक्षक (डीएसपी) प्रकाश बुढाथोकीले बताउनुभयो ।

हेलिकप्टर दुर्घटनामा घाइते हुनुभएका यात्रुलाई अर्को हेलिकप्टरबाट काठमाडौँ ल्याइएको छ। 

घाइते राईलाई उपचारका लागि काठमाडौँ ल्याईएको हो  । उहाँलाई एयर डाइनेस्टीकै अर्को हेलिकप्टरले उपचारका लागि काठमाडौँ ल्याइएको हो। 

हेलिकप्टरमा चालकसहित ६ जना सवार रहेका थिए। अन्य पाँच जना सकुसल रहेका छन्।