मोटरसाईकलको ठक्करबाट विजयश्वरी बोर्डिङ स्कुलका सञ्चालक भण्डारी घाईते 

रुकुम पश्चिमको मुसिकोट नगरपालिका १३ साधनचौरमा मोटरसाईकलको ठक्करबाट एक जना घाईते हुनुभएको छ । 

जिल्ला प्रहरी कार्यालयका सूचना अधिकारी प्रहरी निरीक्षक हरि प्रसाद पुनका अनुसार मंगलबार दिउँसो ३ बजेको समयमा साधनचौरमा भे ५ प ९४६४ नम्वरको मोटरसाईकलले मुसिकोट नगरपालिका १ स्थित विजयश्वरी बोर्डिङ स्कुलका सञ्चालक ५२ वर्षीय हर्क भण्डारीलाई ठक्कर दिँदा घाईते हुनुभएको हो । 

भण्डारीले सडक पार गर्ने क्रममा खलंगातिरबाट तिब्र गतिमा आएको मोटरसाईकलले ठक्कर दिएको बताईएको छ । प्रहरीले मोटरसाईकल चालक सानीभेरी गाउँपालिका ३ खालचौर निवासी २३ वर्षिय शशिराम चदारालाई पनि सामान्य चोट लागेको र भण्डारीको उपचारमा संलग्न रहेको जनाएको छ । 

घाईते भण्डारीको साथमा रहनुभएका सोहि स्कुलका शिक्षिका जानुका कुमारी शाहीका अनुसार तिब्र गतिमा आएको मोटरसाईकलले ठक्कर दिदा भण्डारी घाईते हुनुभएको हो ।

साधनचौरमा राष्ट्रपति रनिङ शिल्ड अन्तर्गतका खेल गतिविधिहरुमा सहभागिता जनाउन विजयश्वरी स्कुलका सञ्चालन भण्डारी जानुभएको र सोहि क्रममा मोटसाईकलले ठक्कर दिएको विद्यालयले जनाएको छ । 

घाईते भण्डारीको टाउको र शरिरका अन्य भागमा चोट लागेको छ । उहाँलाई उपचारको लागि एम्बुलेन्समार्फत जिल्ला अस्पताल सल्लेमा ल्याईएको छ । घटनाको अनुसन्धान भईरहेको प्रहरीले जनाएको छ ।