मतदाता पर्खिरहेका छन् मतदानस्थलहरु 

भोली बिहिबार हुने प्रतिनिधि सभा सदस्य निर्वाचनका लागि रुकुम पश्चिमका सबै मतदान स्थलहरुमा मतदान केन्द्र निर्माण भएका छन् ।

जिल्लामा कायम भएका ७६ मतदानस्थलमा रहेका १४० स्थायी र दुई अस्थायी गरी १४२ वटा मतदान केन्द्रहरुमा मतदान स्थल निर्माण सम्पन्न गरिएको हो । 

आठबिसकोट नगरपालिका ३ स्थित श्री हिमालय माध्यमिक विद्यालय खदीमा रहेको मतदान केन्द्रका मतदान अधिकृत शेरप्रसाद ढकालले मदतान केन्द्र निर्माणको काम पुरा भएको जनाउनुभयो । उहाँका अनुसार मतदानस्थलहरुले भोली हुने मतदानका लागि मतदाता पर्खिरहेका छन् । 

मतदान केन्द्रमा खटिएका कर्मचारीहरूको अभिमुखीकरण र मतदान केन्द्र निर्माण कार्य सम्पन्न गरेर मतदानको तयारी पुरा गरिएको हो । मतदान अधिकृत ढकालले मतदान प्रक्रियाका लागि जिम्मेवारी अनुसारको बसाइँ व्यवस्थापन, कर्मचारी अभिमुखीकरण, मतदाताहरूको लाइन व्यवस्थापन, मतदान स्थलको सौन्दर्यको लागि पतका लगाउनु साथै प्रवेशद्वारमा मतदाताहरुलाई स्वागत व्यानर समेत  लगाउने कार्य सम्पन्न गरिएको छ ।

आवश्यक सामाग्रीहरु जुटाएर सुरक्षित मतदान केन्द्र निर्माण गरिएको चौरजहारी नगरपालिका १ स्थित आधारभूत विद्यालय नाखिराका मतदान अधिकृत यमबहादुर केसीले जानकारी दिनुभयो । उहाँका अनुसार मुख्य निर्वाचन अधिकृतको कार्यालय र जिल्ला निर्वाचन कार्यालयबाट आवश्यक सामाग्रीहरु बुझेर आएपछि मतदान केन्द्रमा सर्वदलिय तथा सर्वपक्षिय बैठक सम्पन्न गरेर मतदान केन्द्र निर्माण गरिएको छ ।

कर्मचारीहरूले बैठक तथा कार्यस्थल व्यवस्थापन, बुथ निर्माण लगायतको काम पुरा गरिएको केसीले जनाउनुभयो । सबै मतदान केन्द्रमा महिला र पुरुषका लागि छुट्टाछुट्टै प्रवेशद्वार बनाइएको छ । 

जिल्ला निर्वाचन कार्यालयका अनुसार एक मात्र निर्वाचन क्षेत्र रहेको रुकुम पश्चिममा ७६ मतदान स्थल रहेका छन् भने १४० स्थायी र दुई अस्थायी गरी १४२ वटा मतदान केन्द्रहरु रहेका छन् । यहाँ कुल मतदाता संख्या एक लाख छ हजार ६६० जना रहेको छ ।

जसमा पुरुष मतदाता ५४ हजार २६३ जना रहेका छन् भने महिला मतदाता ५२ हजार ३९६ तथा एक जना अन्य मतदाता रहेका छन् । यहाँ रुकुम पश्चिममा १२ जना उम्मेदवार चुनावी प्रतिस्पर्धामा छन् ।