निर्वाचनमा भरपर्दो सुरक्षा व्यवस्थाका लागि एआईजी राठौरको निर्देशन

नेपाल प्रहरीका प्रहरी अतिरिक्त महानिरीक्षक (एआईजी) सुशिल सिंह राठौरले भरपर्दो सुरक्षा व्यवस्थाका लागि रुकुम पश्चिमस्थित प्रहरीलाई निर्देशन दिनुभएको छ । 

यही फागुन २१ गते हुने प्रतिनिधि सभा सदस्य निर्वाचनको सन्दर्भमा निरीक्षण तथा अनुगमनको लागि नेपाल प्रहरी प्रधान कार्यालयबाट रुकुम पश्चिम आउनुभएका एआईजी राठौरले मङगलबार जिल्ला प्रहरी कार्यालयमा उक्त निर्देशन दिनुभएको हो । 

नेपाल प्रहरीको अपराध अनुसन्धान विभागका विभागीय प्रमुख समेत रहनुभएका एआईजी राठौरले निर्वाचनमा प्रहरी जनशक्ति परिचालन, शान्ती सुरक्षा व्यवस्थापन र भयरहित वातावरणमा निर्वाचन सम्पन्न गर्नमा प्रहरीको भूमिकाको बिषयमा समेत निर्देशन दिनुभएको छ । 

निर्देशनका क्रममा प्रहरी कर्मचारी र निर्वाचन प्रहरी समेतलाई उहाँले स्वच्छ, निश्पक्ष र भयरहित वातावरणमा निर्वाचन गराउनुपर्ने बताउनुभयो । एआईजी राठौरले प्रहरीको व्यवसायिक छबिमा कुनै पनि आँच नआउने गरी उत्कृष्ट कार्य गर्न निर्देशन दिनुभयो । 

रुकुम पश्चिमको निर्वाचन उत्कृष्ट र सौहार्दपूर्ण रुपमा सम्पन्न बनाउन सबै राजनीतिक दल तथा उम्मेदवारहरु बिच आपसी समन्वयलाई निरन्तरता दिदै निर्वाचन सम्बन्धी कानूनको कार्यान्वयमा समेत प्रहरीको भूमिका अब्बल हुनेपर्ने उहाँको भनाइ रहेको छ । 

निर्वाचनमा उदण्डता देखाउने, उच्छृङखलता देखाउने, वातावरण बिचोल्न खोज्ने जुनसुकै व्यक्ति तथा तत्वहरुलाई कानूनी कारबाहिको दायरामा ल्याउन समेत उहाँले निर्देशन दिनुभयो । 

जिल्ला प्रहरी कार्यालयका प्रहरी नायब उपरीक्षक (डिएसपी) बेदबहादुर पौडेलले प्रहरी प्रधान कार्यालयबाट प्राप्त हुने निर्देशन तथा केन्द्रिय सुरक्षा योजना अनुसार जिल्लाभर प्रहरी परिचालन भएको जानकारी दिनुभयो । जिल्लामा रहेको जनशक्ति बाहेक पनि थप प्रहरी जिल्लामा परिचालन हुने उहाँले जानकारी दिनुभयो ।

यसका साथै जिल्ला सुरक्षा समितिको निर्णय बमोजिम जिल्लाका विभिन्न तीन स्थानमा नोपली सेना र सशक्त प्रहरी बलको निर्वाचन सुरक्षा बेस समेत स्थापना गरिएको डिएसपी पौडेलले जानकारी दिनुभयो ।

निर्वाचन केन्द्रित निर्देशन तथा अनुगमनको क्रममा सोमबार रुकुम पश्चिम आउनु भएका एआईजी राठौर मंगलबार जिल्ला प्रहरी कार्यालयको निरीक्षण समेत गर्नुभएको थियो ।