रुकुम पश्चिममा नेकपा र जनमोर्चाले मात्र बुझाए घोषणा पत्र, ६ उम्मेदवारले खोले बैंक खाता

रुकुम पश्चिममा आगामी फागुन २१ गते हुने प्रतिनिधि सभा सदस्य निर्वाचनमा सहभागी १२ दल मध्य दुई दलले मात्र चुनावी घोषणा पत्र बुझाएका छन् । निर्वाचन आयोगले तोकेको समयभित्र दुई दलले मात्र घोषणापत्र बुझाएका हुन् । 

जिल्ला प्रशासन कार्यालयमा निर्वाचन आचारसंहिता बिषयमा भएको छलफल कार्यक्रममा मुख्य निर्वाचन अधिकृत दिपेन्द्र थापा मगरले सोमबार बिहानसम्म नेपाली कम्युनिष्ट पार्टी (नेकपा) र राष्ट्रिय जनमोर्चाले मात्र घोषणा पत्र बुझाएको जानकारी दिनुभयो ।

निर्वाचन आयोगले फागुन ३ गतेभित्र घोषणा पत्र सार्वजनिक गरी राजनीतिक दलले आयोगमा र उम्मेदवारले निर्वाचन कार्यालयमा पेस गर्न निर्देशन गरेको थियो । 

त्यसैगरी उम्मेदवारी दिएका १२ दल मध्य छ दलका उम्मेदवारले मात्र चुनावी खाता खोलेका छन् । मुख्य निर्वाचन अधिकृत मगरका अनुसार राष्ट्रिय जनमोर्चा, नेपाली कांग्रेस, नेपाली कम्युनिष्ट पार्टी, आम जनता पार्टी, राष्ट्रिय प्रजातन्त्र पार्टी र उज्यालो नेपाल पार्टीले निर्वाचन प्रयोजनका लागि खाता खोलेका छन् । उहाँका अनुसार राष्ट्रिय स्वतन्त्र पार्टी, प्रगतिशिल लोकतान्त्रिक पार्टी, नेपाल मजदुर किसान पार्टी, नेकपा (सयुक्त), नेकपा (माओवादी) र नेकपा (एमाले)ले बैंक खाता खोलेको जानकारी दिएका छैनन् । 

विभिन्न दलका उम्मेदवार तथा प्रतिनिधिहरु सहभागी बैठकमा मुख्य निर्वाचन अधिकृत मगरले निर्वाचन आचारसंहिताको पालना गर्न र उल्लंघन भएको खण्डमा जरिवाना तथा उम्मेदवारी रद्ध सम्मको व्यवस्था रहेको स्मरण गराउनुभयो । उहाँले हालसम्म आचारसंहिता उल्लंघनबारे कुनै पनि लिखित उजुरी नपरेको जानकारी दिनुभयो । 

प्रमुख जिल्ला अधिकारी एवम् जिल्ला सुरक्षा समितिका प्रमुख दिनेशप्रसाद थानीले हालसम्म सौहार्दपूर्वक चुनावी कार्यक्रमहरु भईरहेको र आगामी दिनहरुमा पनि सबै उम्मेदवार तथा राजनीतिक दलहरुबाट आचारसंहिता पालनामा प्रतिबद्धता प्राप्त भएको जनाउनुभयो ।

चुनावलक्षित सुरक्षा व्यवस्था र मतदान केन्द्रहरुको अनुगमनबारे जानकारी गराउनु हुँदै प्रजिअ थानीले रुकुमको निर्वाचन उदाहरणीय रुपमा सम्पन्न भएको सन्देस दिन सबैको सहकार्य र सद्भाव आवश्यक रहेको उल्लेख गर्नुभयो । उहाँले चुनावी कार्यक्रमहरुको जानकारी स्थानीय प्रशासनलाई दिन र केहि गुनासा तथा समस्या भएमा बेलैमा जानकारी गराउन अनुरोध गर्नुभयो । 

कार्यक्रममा कोष नियन्त्रक एवम् निर्वाचन आचारसंहिता अनुगमन अधिकृत गोबिन्दप्रसाद सुवेदीले आयोगले निर्वाचनको खर्चलाई व्यवस्थित, पारदर्शी र अनुशासति बनाउन बैंक खाता खोल्ने प्रावधान ल्याएकोले सबै दल तथा उम्मेदवारले पालना गर्न अुनरोध गर्नुभयो ।

उहाँले निर्वाचन कार्यालयको सिफारिसको आधारमा उम्मेदवार र उहाँका प्रतिनिधिले पनि चुनावी प्रयोजनका लागि खाता खोल्न सक्ने जानकारी दिनुभयो । निर्वाचनका लागि प्राप्त गर्ने र खर्च गर्ने रकमको प्रयोजनका लागि खाता खोल्नुपर्ने र सोहि अनुसारको विवरण निर्वाचन पश्चात पनि आयोगलाई बुझाउनु पर्ने उहाँले जनाउनुभयो । 

बैठकमा सबै राजनीतिक दलका प्रतिनिधी तथा उम्मेदवारहरुले निर्वाचन आचारसंहिताको पालनामा प्रतिबद्धता समेत जनाएका छन् । निर्वाचनलाई सौहार्दपूर्ण, स्वच्छ र पारदर्शी बनाउन आचारसंहिता बमोजिम नै चुनावी गतिविधिहरु भईरहेको उनीहरुले जानकारी गराएका छन् ।