रुकुम पश्चिमका ७६ मतदानस्थलको सुरक्षा संवेदनशीलता वर्गीकरण 

फागुन २१ मा हुने प्रतिनिधिसभा सदस्य निर्वाचनका लागि रुकुम पश्चिमका मतदानस्थलहरुको सुरक्षा संवेदनशीलता वर्गीकरण गरेको छ । जिल्लाका ७६ वटा मतदानस्थलहरुलाई तीन भागमा वर्गीकरण गरिएको जिल्ला प्रशासन कार्यालयले जनाएको छ । 

प्रमुख जिल्ला अधिकारी दिनेश प्रसाद थानीका अनुसार निर्वाचनका लागि सुरक्षाको दृष्टिकोणले मतदानस्थलहरुलाई अतिसंवेदनशील, संवेदनशील र सामान्य स्थलको रुपमा विभाजन गरिएको छ । जसअनुसार २१ वटा मतदानस्थल अतिसंवेदनशील, ४३ वटा संवेदनशील र १२ वटा सामान्य रहेका छन् । 

प्रजिअ थानीका अनुसार जिल्लामा सडकको पहुँच, दुर्गम, सञ्चार सम्पर्क, सुरक्षाको दृष्टिकोणले दुरी, विगतको चुनावमा भएको गतिविधि, राजनैतिक गतिविधिहरुको प्रतिश्पर्धा, पूर्वाधारको अवस्था लगायतको आधारमा संवेदनशीलता वर्गीकरण गरिएको हो । २१ वटा मतदानस्थल भने सडकको सहज पहुँच नभएका, दुर्गम, सुरक्षा वेश देखि टाढाको दुरी, विगतको चुनावी गतिविधि लगायतको कारणले अतिसंवेदनशील मानिएको छ । 

रुकुमपश्चिमका छ स्थानीय तहमा ७६ मतदानस्थल रहेका छन् । आठबिसकोट नगरपालिकामा सबैभन्दा बढी र संवेदनशील मतदानस्थल रहेका छन् । यहाँका १६ वटा मतदानस्थल मध्य ११ वटा अतिसंवेदनशील रहेका छन् ।

चौरजहारी नगरपालिकामा १४ वटा, मुसीकोट नगरपालिकामा १५ वटा मतदानस्थल कायम गर्नको लागि प्रशासनले निर्णय गरेको छ । सानीभेरी गाउँपालिकामा ११ वटा, बाँफिकोट गाउँपालिकामा १० वटा र त्रिवेणी गाउँपालिकामा १० वटा मतदानस्थल कायम गरिएको छ । 

तीन वटा मतदानस्थल सार्न प्रस्ताव

प्रशासन कार्यालयले कायम भएका मध्य तीन वटा मतदान केन्द्र सार्न निर्वाचन आयोग समक्ष प्रस्ताव गरेको छ । जिल्लाको त्रिवेणी गाउँपालिका –३ को खारानेटास्थित गाउँपालिका अस्पतालमा रहेको मतदानस्थललाई सोहि वडाको सरस्वती आधारभूत विद्यालय हर्लेखारामा सार्न प्रस्ताव गरिएको छ ।

त्यसैगरी आठबिसकोट नगरपालिका –७ को सामुदायिक स्वास्थ्य क्लिनिक बैरीगाउँमा रहेको मतदानस्थललाई सोहि वडाको दाजेमा रहेको वडा कार्यालयमा र आठबिसकोट नगरपालिका –१२ स्थित जनकल्याण माध्यमिक विद्यालय सानीबार्खुमा रहेको मतदानस्थललाई वडा नम्वर १२ को कार्यालयमा सार्न प्रस्ताव गरिएको जिल्ला प्रशासन कार्यालयले जनाएको छ । 

जिल्लामा निर्वाचनलाई निष्पक्ष, शान्तिपूर्ण र भयरहित ढङ्गबाट सम्पन्न गर्नका लागि केन्द्रीय सुरक्षा समितिको निर्देशन अनुसार काम सुरु भएको प्रजिअ थानीले उल्लेख गर्नुभयो ।