भरिएको स्यार्पुतालले लोभ्याउँदै पर्यटक (फोटो फिचर)

रुकुम पश्चिमको बाँफिकोट गाउँपालिका वडा नम्वर ३ र ५ मा रहेको पर्यटकीयस्थल स्यार्पुताल यतिबेला टमक्क भरिएको छ । २.६ वर्गकिलोमिटर क्षेत्रमा फैलिएको यो ताल भरिएर थप आकर्षक बनेको कारण पर्यटकहरु बाक्लिन थालेका छन् ।

बिदा तथा पर्वको अवसरमा दर्जनौ आन्तरिक पर्यटकहरु तालको अवलोकन, डुङगा शयर तथा स्थानीय माछाको परिकारको स्वादको लागि पुग्ने गरेका छन् । तालमा आधुनिक डुङगा सञ्चालन गरिरहनुभएका स्थानीय दरिभान पुरीले बिदाको दिन करिब एक सय आन्तरिक पर्यटकहरु आउने गरेको बताउनुभयो ।

अन्य दिनमा २०–३० जना आन्तरिक पर्यटकहरु स्यार्पुतालको अवलोकनका लागि आउने गरेको उहाँले जनाउनुभयो । बिदाको दिन आधुनिक डुङगामा चढेर ताल परिक्रमा गर्नेहरुले पालो कुर्नपर्ने अवस्था हुन्छ । 

स्थानीय बुद्धिजिवी गोपाल केसीले यतिबेला स्यार्पुतालले पर्यटकको मन तानिरहेको बताउनुभयो । चटक्क सिंगारिएकी दुलही जस्तो आकर्षक स्यार्पुताल हेर्न आउने आन्तरिक पर्यटकहरु स्पार्पुको वासनामा लठ्ठिने गरेको उहाँले उल्लेख गर्नुभयो । 

तालको छेउमा रहेको स्पार्पुगाउँ र दहगाउँले ताललाई थप आकर्षक बनाएका छन् । भरिएको तालबाट दह ढल्ने स्थानबाट बग्ने पानी दहि जस्तै देखिने हुनाले एकनाश स्पार्यु हेरिरहुँ लाग्ने सानीभेरी गाउँपालिकाका मानविर ओलीले बताउनुभयो । 

वर्षायाममा बढेको स्यार्पुको शोभाले पर्यटक तानिरहेको स्थानीयले बताएका छन् । ताल विशेष गरी बर्खायाममा हेर्न लायक हुन्छ । स्यार्पूतालको आकार बर्खा र हिउँदमा फरक हुन्छ । स्यार्पुले आकार मात्र होईन रंग पनि बदल्छ ।

भरिभराउ तालको भाद्र देखि असोज महिनाभरी सुन्दर अवलोकन गर्न सकिन्छ । त्यसपछि तालको आकार विस्तारै घट्दै जान्छ । हिउँदमा पनि ताल निकै रमणिय देखिन्छ । 

हिमालबाट बगेर आउँने पानी तालमा मिसिने भएका कारण यहाँ स्नान गर्दा स्वास्थ्यका लागि फाइदाजनक रहेको पनि स्थानीयको विश्वास छ । पर्यटन मन्त्रालय अन्तर्गत डिभिजन वन कार्यालय रुकुम पश्चिमले तालको घेराबार गरेपछि थप आकर्षणको केन्द्र बनेको छ ।